Берік сомдаған образдар қандай?

Маған танымал театр және кино актері Берік Айтжановтың шеберлігі ұнайды. Соңғы кезде оны «Тракторшының махаббаты» телехикаясынан көріп жүрмін. Актердің түскен кинолары, сомдаған образдары туралы жазсаңыздар екен.
Гүлбану ШАЛҚАРБЕК, Талғар қаласы
Сырлы сезім мен кереғар көзқарастар, тағдыр түйткілдері көрініс тапқан «Трак­торшының махаббаты» Беріктің түсіп жатқан жалғыз картинасы емес. Ол сондай-ақ қазіргі таңда режиссер Ермек Шынарбаевтың «Дала дауысы» деген фильмінде басты рөлдердің бірін ойнайды. Актердің айтуын­ша, бұл туындыға шетелден де актерлер шақыртылған. Берік фильмде Абай есімді бизнесмен бейнесін сомдайды. Тағы бір басты рөлде әйгілі француз актері Жерар Депардье ойнайды. Қазіргі таңда түсіру жұмыстары қызу жүріп жатыр.
Мұның сыртында Берік Айтжанов қараша айында Сатыбалды Нарымбетовтің тарихшы Ермахан Бекмахановтың өмір жолынан сыр шертетін «Аманат» атты киносына түспекші. Ал бұған дейін ол «Қасқыр мезгілі», «Махам­бет», «Махамбеттің қылышы», «Нағыз полковник», «Ликвидатор», «Арман қала» сияқ­ты фильмдер мен «Ағайынды» теле­хикаясында ойнаған.