Бейтарап елге бәле жоламайды
Әлемде жау сескендірер әскері жоқ әрі соғыс қасіретін көрмеген елдер туралы естіп қаламын. Шынымен де, соғыс көрмеген елдер бар ма?
Мират Бекетов, Талдықорған
Әлбетте, басқа елдер тарапынан соғыс ашпауға кепілдік алған үш-төрт ел бар. Әрине, бұл әскері жоқ дегенді білдірмейді. Әлемдегі Швеция, Швейцария, Коста-Рика елдері – осындай елдер. Бұл мемлекеттерді «бейбітшілік сақтаушылар» деп атайды. Мысалы, Швеция мемлекеті 1814 жылы Норвегия тарапынан басқыншылыққа ұшырағанын есепке алмағанда, бұл елге Екінші дүниежүзілік соғыстың ызғары да жетпепті. Ал қымбат сағаттар мен сенімді банктердің мекені – Швейцария елі 1848 жылдан бері соғыс көрмеген. Бұл елдің саясаты – тек қана бейтараптық. Коста-Рика елінде де қой үстіне бозторғай жұмыртқалаған бейбіт заманның шырқы бұзылмай келе жатыр.
