Бас бармақ неге басқасынан құрметті?
Қарап тұрсақ, саусақтарымыздың ішіндегі ең қысқасы бас бармағымыз екен. Кішкентайлығына қарамастан, оны неге бас бармақ дейміз?
Нұрбұлан РЫМҒАЛИ, Қапшағай.
Шын мәнінде, бас бармақ басқа саусақтарға қарағанда әрі жуан, әрі үлкен. Сондай-ақ ол негізінде алақанмен тұтаса біткен. Бұл – ең негізгі саусақ. Заттарды қолмен ұстау, сол сияқты инені сабақтау, ұсақ заттарды теріп алу іспетті жұмыстар бас бармақтың арқасында атқарылады. Америкалық антрополог Томас Грейнердің пікірінше, табиғаттағы ең күшті, ең қуатты қармау құралы да – бас бармақ пен сұқ саусақ және бұл адамнан басқа ешкімде жоқ. Егер де бас бармақ бұдан ұзындау болса, адамның қолы мұншалықты епті болмас еді. Мұнымен қоса бес саусақтың бірдей еместігінің өзі адамды хайуаннан айтарлықтай ерекшелеп және теңдессіз етіп тұр.
