Бадминтон мен регби атаулары қайдан шыққан?
«Бадминтон мен регбидің спорттық атаулары ойынның ережелері мен тарихына мүлде байланысты емес» деп естідім. Сол рас па?
Ернар ИСЛАМҒАЛИЕВ, Шымкент
Футбол, баскетбол, бокс, шахмат сынды спорт түрлерінің атаулары аталған ойын түрлеріне тікелей байланысты. Яғни футболда аяқпен доп ойнайды, бокста жұдырықтасады тағы басқа. Ал бадминтон мен регбидің атаулары аталған екі ойын түріне мүлде қатыссыз. Бадминтон ойыны үлкен спорт жанашыры саналатын герцог Бофорттың резиденциясының есімін иеленген. 1873 жылы герцог Бофорт бадминтонға арналған алаңқай салдырып, спорттың бұл түрінің дамуына ерекше ықпал етті. Ал регби спортының көне грек дәуірінде пайда болса да, 1870 жылға дейін атаусыз жүргені қызық. Дәл осы жылы ағылшындық «Регби» жеке мектебінің оқушылары регби спортының ережелерін жинақтап шығарды. Осыдан соң спорттың бұл түріне бүгінге дейін өзгермеген «регби» атауы таңылған еді.
