Ауылым экологиялық апат аймағына жата ма?

Ақтөбе облысының Мұғалжар ауданы экологиялық апат аймағына кіре ме? Егер кіретін болса, ол қандай заңда немесе құжатта көрсетілгенін айтып жіберсеңіздер екен.
Шалабай БЕКТЕМІРОВ, Ақтөбе облысы
Ақтөбе облысының Мұғалжар ауданы экологиялық дағдарыс жағдайына жақын­даған аймақтар қатарына кіреді. Ол ҚР 1992 жылғы 30 маусымдағы «Арал өңіріндегі экологиялық қасірет салдарынан зардап шек­кен азаматтарды әлеуметтік қорғау туралы» Заңда көрсетілген. Осы Заңның 3,4,5-бапта­рына сәйкес, эколо­гиялық апат аймағына Қызылорда облы­сы­ның Арал және Қазалы аудандарының, Ақтөбе облысының Шалқар ауданының аумақтары кiредi. Ал экологиялық дағда­рыс аймағына Қызылорда облысының барлық ауданы, Байқоңыр қаласы және облыс орталығының өзі жатады. Заңға сәйкес, Ақтөбе облысының Байғанин, Ырғыз, Мұғал­жар, Темiр аудандарының, Оңтүстiк Қазақстан облысының Арыс, Отырар, Созақ, Шардара аудандарының, Түркiстан қаласының және Қарағанды облысының Ұлытау ауданының аумақтары Арал теңізінің тартылуы салдары­нан эко­ло­гиялық дағдарыс жағдайына жа­қында­ған аймақ саналады.