Атырау облысында жаңа кеден бекеті ашылды
Мен Атырау облысында дүниге келгенмін. Бірақ қазіргі күні отбасыммен Алматы қаласында тұрамын. Өзім — кәсіпкермін. «Жақында Атырау облысында жаңа кеден бекеті ашылады» дегенді естіп едім. Сұрайын дегенім, кеден бекеті ашылды ма? Егер ашылса, онда нақты қандай жұмыстармен айналысады?
Самат БЕКБЕРГЕНҰЛЫ, Алматы қаласы
Бұл сұрақтан кейін біз Атырау облысының кедендік департаментіне хабарластық. Департаменттің баспасөз қызметі өкілдерінің айтуынша, облыста «Арнайы экономикалық аймақ – Ұлттық индустриалды мұнай-химия технопаркі» жаңа кеден бекеті ашылды. «Бұл бекет Мақат ауданындағы жаңа газ-химия кешеніне жеткізілетін жүктерді рәсімдеумен айналысады», – дейді баспасөз қызметі. Атырау облысындағы ірі мұнай-химия жобаларының барлығында әр жобаға арнап бөлек кеден бекеттері ашылған.«Мысалы, Теңіз кен орнында «Теңiз» кеден бекеті жұмыс істейді, ал Солтүстік Каспий жобасында жүктерді рәсімдеумен «Қашаған» кеден бекеті айналысады», – дейді өкілдер.
