Жақында бір танысым «Атырауда шайбалы хоккейді дамыту қолға алынып жатыр, мұзайдын салынды, енді жергілікті командаға қазақша жақсы, әдемі ат қою мәселесі қаралуда» деп еді. Мұнайлы өлке өз клубтарын қалай атады екен?
Атырау өздерінің биыл ғана құрылып, жасақталып жатқан хоккей клубын «Бейбарыс» деп атады. Сөз жоқ, тамаша атау. Жалпы, бізде шайбалы хоккейден ел чемпионатына қатысатын клубтардың атаулары, кейбір спорттық ойындар түрімен салыстырғанда, көңілге қонымды, қазақшасы басым. Атыраулықтар сияқты биыл өз командаларын ел біріншілігіне үкілеп қосқалы отырған Көкшетау жаңадан жасақтап жатқан клубтарын «Арлан» деп атапты. Бұған Астананың «Барыс» хоккей клубын қосыңыз. Қарағандылықтардың да клубтарының аты қазақша – «Сары-арқа». Орыс тілінде «Қазақмыс» (Сәтбаев) клубының бірінші әрпі «К» болып, ал бесіншісі «х» болып өзгеріп кететіндігі болмаса, оны да қазақша аталған дей аламыз. Өзіміз «Ертіс» дейтін, ал орыстілділер «Иртыш» дейтін Павлодар клубы – екі жаққа бірдей. Тек «Казцинк-Торпедо» (Өскемен) және «Горняк» (Рудный) клубтары ғана таза орысша аталады. Осыдан бірер жыл бұрын Алматыда «Еңбек» атты клуб болған. Міне, өздеріңіз байқап отырсыздар, шайбалы хоккейдегі клубтардың көбі қазақша аталған. Бірақ осы клубтардың көбінің сапында қазақтар тұрмақ, қазақстандықтар саусақпен санап аларлықтай...