Ат жарыстарының ережесі қандай?

Биыл Ұлыстың ұлы күніне байланысты ат жарыстарынан бәйге ұйым­дастыруды қолға алған едім. Алайда ережелерін білмегендіктен, доданы ал­да­ғы уақыттың еншісіне қалдырдым. Менің білгім келгені, ат жарыстарының қа­рапайым да түсінікті ережесі бар ма?
Дидар Мұңалбай, ШҚО
М.Әуезов атындағы Оңтүстік Қазақ­стан мемлекеттік университетінің доценті Қ.Әбішев пен Қазақтың туризм және спорт академиясының доценті Х.Үнтаев ат жарыстарының мынадай қарапайым ере­желерін былайша таныстырған еді:
Тай жарыс – 1,5 жасқа дейінгі 3-5-7 ша­қырым аралықтағы қашықтыққа ша­бы­лады. Тайдың үстінде салмақтары ауыр емес жас жеткіншектер ғана отыруы тиіс.
Құнан жарыс – екі жастағы жылқы төлі арасындағы 10-15 шақырымдық жарыс.
Тоқ бәйге жарысы – Бұған тай мен құ­наннан басқа барлық жастағы аттар қа­тыс­­тырыла береді. Бәйге 13-23 шақы­рым­ды құрауы керек.
Жорға жарыс – жорғаға түсетін аттарды сыннан өткізу арқылы анықтайды. Атты алдымен бір айналымға жібереді. Егер әлгі сында ат үш рет шауып кетсе, жарысқа жіберілмейді. Сондай-ақ жарыс кезінде жорға ат шауып кеткен сайын уақытына 10 секундтан қосылып оты­рады. Егер шабыстың саны үштен асса, жарыстан шығарылады. Жарысқа 16-60 жас аралығындағы адамдар қатыса ала­ды. Ал қашықтығы 2-4-6 шақырымды құрайды.
Аламан бәйге – аттың жасы үштен асуы керек. Жарыс ұзақтығы 25-31ша­қы­рым болады.
Ұлы аламан бәйге (Супер марафон) – жарыстың ұзақтығы 40, 60, 80, 120, 160 шақырымды құрап, бәйгеге түсушілер күні бойы жарысады. Бұл жарыстың ережесі Дүниежүзілік ат спорты ере­же­сінде бекітілген.