«Еліміздің кез келген тұрғыны өздерінің берген арыз-шағымдары бойынша қандай шара қолданылып жатқанын онлайн режімінде бақылап отыра алатын болыпты» деп естідім. Осы рас па?
Жеткер Жасұзақов, Шығыс Қазақстан облысы
Еліміздің кез келген азаматы мемлекеттік органдарға жазған арыздары бойынша қандай шара іске асырылып жатқанын онлайн режімінде бақылай алады. Бұл туралы Шығыс Еуропа және Орталық Азия елдері прокурорлары халықаралық қауымдастығының VI Өңірлік конференциясы барысында Бас прокуратураның Құқықтық статистика және арнайы есеп комитетінің төрағасы Марат Ахметжанов мәлім етті.
Енді азаматтардың арыз-шағымдары міндетті түрде Бас прокуратураның құқықтық статистика жөніндегі базасында тіркеледі. «Яғни енді жасалған қылмыстарға қатысты қандай да бір қитұрқы әрекеттер жасауға болмайды және еліміздің әрбір тұрғыны немесе қандай да бір ведомствоның басшысы белгілі бір арыз немесе шағым бойынша қолданылған шараларды онлайн режімінде бақылап отыра алады», – деді комитет төрағасы.
«Мұндай жүйе бүгінде тек Корея Республикасында ғана бар көрінеді. Ол «ашықтық жүйесі» деп аталады. Ал біз «Айқын» деген жүйені іске қосамыз. Бұл ҚР Байланыс және ақпарат министрлігімен бірге жүзеге асырылады. 2012 жылдан бастап, барлық мемлекеттік органдар бірыңғай режімде жұмыс істейтін болды. Яғни республикамыздың кез келген азаматының арызы, қай мемлекеттік органға жазылғандығына қарамастан, «Айқын» жүйесінің мәліметтер базасында орналасады», – дейді М.Ахметжанов.
Оның айтуынша, мұндай жүйе прокуратура қызметкерлеріне жағдайды назарда ұстап, оны талдап, сараптап, нақты басқарушылық шешім қабылдауына мүмкіндік береді. «Мысалы, прокуратура қызметкерлері азаматтардың қандай мәселелер бойынша және қай органға көп шағымданатынын, қоғамда қандай проблемалар болып жатқанын біліп отырады», – дейді комитет төрағасы.
Арыз-шағым нәтижесін онлайн режімінде бақылай аласыз
Последние статьи автора