Ақысыз демалыстан кейінгі жұмысқа шығу тәртібі қандай?

Декреттік демалыстан кейін 2012 жылдың 1 қарашасына дейін ақысыз демалысқа шыққан қызметкер 28 қазанда келіп, жұмысқа шығатыны жайлы айтып, бірақ өтініш жазбай кеткен еді. Қараша айының соңында жұмысқа шығатыны туралы өтініші почта арқылы келді. 1 желтоқсаннан жұмысқа шықты. «Қараша айынан жұмысқа өтініш жазғанмын, сіздер маған бір ай кешігіп бұйрық шығардыңыздар, енді сол уақыттың ақысын төлеңдер, әйтпесе сотқа берем» деп отыр. Қызметкердің осы талабы заңды ма?
Айғаным, Жамбыл облысы
ҚР Еңбек кодексінің 195-бабына сәйкес, жұмыс берушi қызметкерге:
1) ата-анасының қалауы бойынша – баланың ана­сына не әкесiне;
2) баланы жалғыз тәрбиелеп отырған ата-ана­ның бiреуiне;
3) ата-анасының қамқорлығынсыз қалған бала­ны iс жүзiнде тәрбиелеп отырған әжесiне, атасына, басқа туысына немесе қамқоршысына;
4) жаңа туған баланы (балаларды) асырап алған қызметкерге бала үш жасқа толғанға дейiн баланың күтiмiне байланысты жалақы сақтал­май­тын демалыс беруге мiндеттi. Бала үш жасқа толғанға дейiн оның күтiмiне байланысты жалақы сақталмайтын демалыс осы баптың 1-тармағында көрсетiлген қызметкердiң жазбаша өтiнiшi негiзiнде оның қалауы бойынша толық немесе бөлiнiп пайдаланылуы мүмкiн. Бала үш жасқа толғанға дейiн оның күтiмiне байланысты жалақы сақтал­майтын демалыс уақытында қыз­мет­кердiң жұмыс орны (лауазымы) сақталады. Егер Қазақстан Респуб­ликасының заңдарында өзгеше көзделмесе, бала үш жасқа толғанға дейiн оның күтi­мiне байланысты жалақысы сақталмайтын демалыс уақыты жалпы еңбек өтіліне, мамандығы бойын­ша жұмыс өтіліне есептеледi.
Бала үш жасқа толғанға дейiн бала күтiмi бойынша жалақысы сақталмайтын демалыс аяқ­тал­ғанға дейiн жұмысқа шыққан жағдайда, қыз­мет­кер жұмыс берушiге өзiнiң ниетi туралы жұмыс бас­талуынан бiр ай бұрын ескертуге мiндеттi. Атал­ған нормалар қызметкер баланы үш жасқа толғанға дейін оны күту демалысына шыққан жағдайда қол­да­нылады. Ал қызметкер тек қана ақысыз дема­лыс­қа шыққан болса, оның аяқталу мерзімі тарап­тар­дың келісімі бойынша алдын ала белгіленуі тиіс.