Ана сүтінің химиялық құрамы қандай?

Адамның ең алғашқы қорегі – ана сүтінің құрамы неден тұрады? Сүт құрамындағы заттар сәбилі болған әйелдің диетасына байланысты бола ма?
Перизат Сағынғанова, Алматы қаласы
Ана сүті – нәрестенің иммундік қор­ға­нышын нығайтып, ағзасының дамуын рет­тейтін өнім. Оның құрамы құрғақ заттардан (11,9 %), майдан (3,9 %), ақуыздан (1,0 %), лактозадан (6,8 %) және минералды заттардан (0,2 %) тұрады. Ана сүтінің 100 грамға шаққандағы энергетикалық құндылығы 70 кило­калорияға тең. Мұндай жағдайда сүттің құрамын 87,5 г су, 1,03 г ақуыз, 4,38 май, 6,89 г көмірсу деп өлшеуге болады. Ана сүті ретинол, каротин, тиамин, рибофлавин, ниацин, пантотен қышқылы, пиридоксин, аскорбин қыш­қылы сияқты заттардан және кальций, темір, магний, фосфор, калий, натрий, мырыш тәрізді химиялық элемент­терінен де тұрады. Сәбидің тұңғыш қорегінің құрамы әйелдің сүт бөлу уа­қытына қарай өзгеруі мүмкін. Сүт құ­рамындағы суда еритін дәрумендер мөлшері ананың тамақтану режиміне тәуелді. Басқа компоненттердің, айталық, темірдің мөлшері әйелдің диетасына байланысты емес.