Әлемдік бокс сериясында ұпайлар қалай үлестіріледі?

Теледидардан «Астана арландары» клубының WSB (Әлемдік бокс сериясы) аясындағы кездесулерінің бәрін үзбей көремін. Осы бокс кездесулеріндегі ұпай үлестіру жүйесін түсінбей жүрмін. Жеңген командаға үш ұпайдан береді. Бірақ екі команданың тең түсуі мүмкін болмаса да, кейбір командаларға 1 ұпай беретіндей. Мысалы, 8 кездесу өткізген «Астана арландарының» 16 ұпайы бар. Он алтыншы ұпай қайдан келді?
Ербол ӨМІРЗАҚ, Қарағанды облысы
Сұрағыңыз өте орынды. Басында өзіміз де түсінбей қалып, АІВА сайтындағы WSB ережелерін бастан-аяқ оқып шығып, оның «сырын» білдік. Әрі отандық маман­дардан сұрап, сайттан оқыған ереженің дұрыс­тығына көз жеткіздік.
Сонымен Әлемдік бокс сериясында кез келген жеңіс үшін 3 (үш) ұпай беріледі. Сондай-ақ 2:3 есебімен жеңілген командаға 1 (бір) ұпай беріледі. Ал 1:4 және 0:5 есебімен ұтылған командаларға ешқандай да ұпай берілмейді.
Енді «Астана арландарының» 16 ұпайын тара­тайық. Қазақстан клубы 8 кездесу өткізіп, соның бесеуінде жеңіске жетіп, үшеуінде ұтылып қалды (үшеуінде де –Баку клубынан). Бес жеңісі үшін 15 ұпай алады (5 х 3 = 15). Ал он алтыншы ұпайды «Баку оттарынан» 2:3 есебімен ұтылып, едәуір қарсылық көрсеткендері үшін еншілеген. Қалған екі кездесуде әзірбайжандықтардан 1:4 есебімен ұтылғандықтан, астаналықтарға ешқандай ұпай берілген жоқ.