Әлемдегі ең биік ғимарат қай елде?

Әлемдегі ең биік ғимарат қай елде және оның биіктігі қанша? Басқа елдерде онымен бәсекелес ғимарат салынып жатыр ма?
Мәден МҰХТАРОВ, Ақмола облысы
Бүгінгі таңда әлемдегі ең биік және ең көпқабатты ғимарат – Біріккен  Араб  Әмір­лігінде тұрғызылған бүкіл  әлемге  «Дубай  мұнарасы»  деген атпен  танылған алып нысан. Оның құрылысы 2010 жылы то­лық­тай аяқталып, ақпан айында ашыл­ды. Бұл алып ғимарат Біріккен  Араб  Әмір­лі­гінің   Президенті   шейх  Халифа  бен Заид  әл-Нахаянның  құрметіне  «Бурдж  Халифа»  деп   аталып ке­ле­ді. Ғимараттың биіктігі – 828 метр, қабаттар са­ны – 163. Дубай  мұ­на­расы ең  биік тұрғын  үй  ғимараты  және   әлемдегі ең  биік   тамашалау алаңы бар  нысан (мұ­на­раның 124-ші  және 160-шы  қабат­та­рында  тамашалау алаңдары орна­лас­қан)    са­наттары  бойынша   бірінші  жүл­де ал­ған.   Мұнараның   19-шы және  108-ші қа­баттары аралығында  900 апартамент орналасқан.
Ал онымен бәсекелес мұнараны Әзір­бай­жан елінің астанасы Баку қаласында тұр­ғызу жоспарлануда. Баку мұна­ра­сы­ның биіктігі – 1050 метр, қабаттар саны 189 болады деп күтілуде. Мұнара ай­на­ла­сындағы 2 мың га жерге 41 жасанды арал салынып, Khazar Islands қалашығы бой көтермек. Құрылыстың жалпы құны – 100 млрд доллар, тек мұнараның тұр­ғызылуына 2 млрд доллар жұмсалатын болады. Khazar Islands қалашығында 150 мектеп, 50 аурухана, 1 млн тұрғынға шақ­талған 25-60 көпқабатты үйлер салу жос­парланған. Онымен қоса, қалашықта мәдени-ойын сауық орталықтары, уни­вер­ситет тұрғызылады деп күтілуде.
Құрылыс 2015 жылы басталып, 2018-2019 жылдары мұнара тұр­ғы­зы­лып, 2022 жылы қалашық құрылысы то­лық­тай аяқталмақ.