Адамның денсаулығына кейбір қалалардың ауа райы жақпай жатады. Кейбіреулер адам көп шоғырланған қалаларда ауру-сырқау көп болатынын айтады. Бұл қаншалықты рас және әлемдегі қалалардың қайсысы адам өміріне қауіпсіз болып есептеледі?
Сәуле Берікханқызы, Семей
Қандай қалалардың адам өміріне қауіпсіз екенін Ұлыбритания ғалымдары зерттеп шыққан екен. Ағылшын мамандары адам көп шоғырланған қалалар денсаулыққа айтарлықтай зиян дегенді жоққа шығарады. Олардың арнайы зерттеуі бойынша диабет, семіздік, жүрек аурулары аз кездесетін қалалар анықталды. Ең үздік он шаһардың бірінші сатысында АҚШ-тың Чикаго қаласы тұр. Ал екінші орында – Каталония орталығы Барселона. Үздік үш қаланың қатарында Сан-Франциско да бар. Зерттеу жүргізген ағылшындардың астанасы Лондон қаласы 4-орында екен. Одан кейін Сидней, Нью-Йорк, Берлин, Гонконг, Копенгаген, Париж ондықты құрайды. Ал керісінше, жоғарыда аталған аурулардың таралу қаупі Шотландия астанасы Эдинбургта жоғары көрінеді.