Абай мен Михаэлисті табыстырған – Толстой

Қазақтың ұлы ақыны Абай Құнанбайұлы мен белгілі орыс зиялысы Евгений Петрович Михаэлистің арасында ұлы достық неден басталған? Олар қайда танысқан?
Мәдина ЕРМЕКҚЫЗЫ, Ақтөбе облысы 
Семей қаласының орталығынан 1883 жылы тұңғыш жаңа кітапхана ашылады. Оның ашы­луына Е.П.Михаэлис, А.А.Лентьев, Н.И.Долго­полов, П.Д.Лобановский, Северин, С.С.Гросс тәрізді саяси жер аударылғандар мұрындық болған.
Абай осы кітапхананың тұрақты оқырманы болған. Михаэлис пен Абай ең алғаш осы кітап­ханада кездескен. Ұлы ақын кітапханаға келіп, Л.Н.Толстойдың бір шығармасын сұрайды. Ол кітап Е.Михаэлистің қолында болған. Абайдың сұрағанын көріп,  өткізуге кезекте тұрған Михаэ­лис қолындағы кітабын ақынға береді. Екі ойшыл­дың осы кездесуі таныстыққа,  кейін келе ұлы достыққа жалғасады. Осыдан бастап Абай Михаэ­листің ұсынысымен көркем әдебиет, сын, философия, табиғат ғылымдары, әр алуан тарих­тық кітаптарды таңдап, талғап, жоспармен оқи­тын болған. Абайдың орыстың Пушкин, Лер­мон­тов, Толстой, Салтыков-Щедрин, Некрасов, Белинс­кий, Герцен, Чернышевский, Добролюбов сынды атақты ақын-жазушылары мен сыншы, ойшылдарының шығармаларын оқуында да Михаэлистің ықпалы бар. Олар әлемдік әдебиет жайында да пікірлесіп тұрған. Ұлы ақынның «Менің көзімді дүниеге ашқан – Михаэлис» деп асыра мақтауы да сол ұлы достық сезімінің жемісі.