Абай мен Мәшһүр Жүсіп кездескен бе?

Өз заманының асқан ғұламалары, ойшыл ақындары Абай мен Мәшһүр Жүсіп кездесіпті деп естіген едім. Сол рас па?
Сабырхан САҒЫНДЫҚҰЛЫ, Павлодар облысы
«Тіліміздің жаңа көркемдік дең­гейге жетуіне Абай Құнан­байұлы мен Мәшһүр Жүсіп елеулі үлес қосты. МәшҺүр Жү­сіп әйгілі Абайдың да үлгілі сөздерін қағазға түсіргенін есте ұстаған жөн», – дейді мәш­һүр­танушы Әсет Пазылов. Бұл сөзден біз Абай мен Мәшһүр Жүсіп ара­сын­дағы шығар­ма­шылық бай­ла­ныс­ты аңғарамыз. Ел аузында Мәш­һүр Жүсіптің Абай ауылына ба­руы әңгі­ме­ле­неді. Соның ал­дын­да ғана «мен Мәшһүр Жүсіп­пін» деп, ғұла­маның атын жа­мы­лып, Абайдың үйіне түскен бір ауылдың қуы оны алдап-соғып кетсе керек. Со­ған аузы күйген Абай Мәшһүр Жүсіпке үш сауал қойыпты. «Құ­дай қайда? Жұмақ пен тозақ қай­да?» деп сұрапты. Мәшһүр Жүсіп «Құдай – жүректе, ал жұ­мақ – оң босағада, тозақ – сол босағада. Әйелің жақсы болса, өз үйің – жұмақ, жаман болса – тозақ» деп жауап беріпті. Абай «Сайтан деген кім?» десе, «Осы­ны сұрап тұрған – сен сай­тан» деп, Мәш­һүр Жүсіп ренжіген сы­ңаймен бұрылып кетіп бара жатқанда, «Сен нағыз Мәшһүрдің өзі екен­сің!» деп ақын орнынан атып тұ­рып, әулиені қапсыра құшақтай ал­ған көрінеді. Абай мен Жүсіп ара­сындағы кезде­суде айтылған та­ғылымды сөз­дер бола­шақ ұр­паққа айнымас өсиет-үлгі болып қалары анық.