Ұлттық тестілеу орталығы ҰБТ-2022 нәтижелеріне талдау жасады
Мектеп түлектері «Оқу сауаттылығы» пәнінен ең жақсы нәтиже көрсеткен, - деп хабарлайды Alashainasy.kz тілшісі білім министрлігінің Telegram арнасына сілтеме жасап.
ҚР ҒЖБМ Ұлттық тестілеу орталығы негізгі ҰБТ-2022 нәтижелеріне егжей-тегжейлі тақырыптық талдау жасады. Бас емтихан нәтижелеріне талдау мектептер, ауылдар, аудандар, облыстар бөлінісінде жүргізілді.
Сондай-ақ, ҰТО мамандары тестіленушілердің гендерлік бөлінісі, тапсыру тілі және ҰБТ пәндері бойынша дұрыс жауаптарының саны мен пайызын анықтады.
«Еліміз бойынша дұрыс жауаптардың пайызы 58% құрады. Балалар «Оқу сауаттылығы» пәні бойынша ең жақсы нәтиже көрсетті – сұрақтардың 82%-на дұрыс жауап берді. Одан кейінгі орындарда «Қазақ тілі» 64% және «Қазақ әдебиеті» 60% пәндері болды. «Физика» және «Химия» пәндері бойынша ең аз дұрыс жауаптар берілді, тиісінше көрсеткіштер 40% және 38%-ды құрады. Егер гендерлік талдауды қарасақ, онда қыздардың (59%) нәтижелері ұлдарға (57%) қарағанда жақсырақ болды», – деп ҰТО директоры Руслан Емелбаев нәтижелермен бөлісті.
