Әжімұқан Жамалов, техника ғылымдарының докторы, профессор: "Қазақстанда күн, жел, су энергияларын пайдалануды жетілдіру керек"
«Үкіметіміз Қазақстанда баламалы жаңартылатын энергетиканы дамытудың 2020 жылға дейінгі жоспарын бекіткені белгілі. «Қазақстанда 2050 жылға дейін барлық энергия тұтынудың 50 пайызын энергияның баламалы және жаңғыртылатын түрлерінен алу жоспарлануда.
Еліміз баламалы энергия көздерін дамытудың «жасыл» жолына көшуіне Астанадағы ЭКСПО – 2017 қуатты серпіліс береді. «Жасыл экономика» – ең алдымен, инновация, атқарылатын іс-әрекеттеріміз соған негізделетін болады. Егер қолданысқа шығатын баламалы энергия экологиялық тұрғыдан тұрғындардың сұранысын қанағаттандыратын болса, онда жаңа технология да дамитын болады. Энергия тұтыну – адамзат тіршілігінің міндетті шарты. Әлемдегі қазіргі таңда өндірістердің көбеюіне және жер бетінде адамдардың санының артуына байланысты энергияға деген сұраныс артты, осы қажеттіліктерді қанағаттандыру үшін баламалы энергияны өндіру – қазіргі заманның талабы. Еліміздің қай аймағын алып қарасаңыз да, аңырап тұрған жел, тек пайдаға асырсақ, қанекей... Күн сәулесінің энергиясын да қалағанымызша алуға болады, әсіресе республикамыздың оңтүстігінен. Бұған қоса түкпір-түкпірдегі толып жатқан жер астындағы ыстық су көздерін неге пайдаланбасқа? Айта берсек, баламалы энергия көзі аз емес. Біздің ойымызша, Қазақстанда баламалы энергия жолдарын қолданудың жолдарын көптеп іздестіру керек. Себебі қазіргі кездегі энергия өндіру жолдары өз зардаптарын климатқа, экологияның нашарлануына, бүкіләлемдік климаттың жылынуына, озон қабығының бұзылуына және т.б зардаптарын тигізуде. Сол себепті Қазақстанда күн, жел, су энергияларын пайдалануды жетілдіру керек.
