Жыл соңына таман қазақстандықтар цифрлық теңгені қолдана алады
Бұл туралы Ұлттық банк төрағасы Ғалымжан Пірматов баспасөз мәслихатында мәлімдеді, деп хабарлайды BAQ.KZ тілшісі.
Ұлттық банк басшысынан БАҚ өкілдері «Цифрлық теңге» жобасына қатысты жұмыстардың қандай деңгейде екендігін сұрады.
Егер естеріңізде болса, біз оны толыққанды жүргізу үшін бірнеше жылға бөлген едік. Биыл пилоттық мемлекеттік органдар мен пилоттық әлеуметтік төлемдерді іріктеу процесін жүргізудеміз. Жыл соңына қарай қазақстандықтар белгілі әлеуметтік төлемдерді алу мен біздің пилоттық жобада қамтылған мемлекеттік органдардағы мемлекеттік сатып алуларға қатысқан кезде цифрлық теңгені қолдана алады, - деп атап өтті Ғалымжан Пірматов.
Еске сала кетейік, бұған дейін Ұлттық банк жыл басында инфляция 20,7 пайызға дейін өскені туралы айтқан болатын. Сондай-ақ базалық мөлшерлеме бойынша шешімнің кезекті болжамдық раунд өткізуі арқылы қабылданғаны белгілі болды. Макроэкономикалық көрсеткіштер болжамын жаңартумен қатар инфляция тәуекелдерінің балансы да бағаланған. Инфляцияның өсуіне 25 пайыздан артық қымбаттаған азық-түлік өнімдерінің бағасы ықпал еткен. Сонымен қатар азық-түлікке жатпайтын тауарлар бағасының өсуі 20,2%-ға, қызметтер бағасының өсуі – 14,2%-ға дейін жеделдеген.
