Жаңа салық жобасының артықшылығы мен кемшілігі

Қазақстанның салық заңнамасында  шешілмей жатқан түйіндер әлі де көп.  Мәселен, еліміздің Салық кодексінде халықаралық салық салу және   трансферттік баға қалыптастыру жүйесіне  қатысты баптар жоқ. Кеше Алматыда алдағы күндері өтетін салық форумына қатысты ұйымдастырылған  баспасөз жиынында Қазақстан салық төлеушілер қауымдастығының мүшелері  осындай пікір білдірді.
Ең алдымен, жиынға қатысқандар жаңа Салық кодексіндегі кейбір ерекше­ліктерге  тоқталып өтті. Біріншіден, бұл ко­декс бойынша шағын және орта бизнес өкілдеріне бірнеше жеңілдіктер жасалып отыр. Егер бұрынғы жылдары бұл сала өкілдері ай сайын корпоративтік табыс салығы бойынша аванстық төлемдер тө­леп тұрса, енді олар бұл төлемдерді жыл  аяғында бір-ақ рет төлейді. Екінші бір жеңілдік – корпоративтік табыс салығы 20 пайызға төмендеді. Басқосуға келген қа­уым­дастықтың мүшесі Айдын Бике­баев­тың сөзіне сенсек, келер жылы бұл салық – 17,5 пайызға, екі жылдан кейін 15 па­йызға  дейін түседі. Тағы бір айта кетерлігі, салық есептерінің көлемі азай­тылды. А.Би­кебаев сонымен бірге салық жүйесіне қатысты кемшіліктерді де тіз­белеп өтті. Мәселен, біздегі шағын бизнес өкілдеріне кәсіптерін патент алып қана жалғастыруға мүмкіндік жасалмай келеді. Оларға ірі кәсіпкерлермен қатар талап қойылып отыр. Табысынан жырып, 10 пайыз салық төлейтін адвокаттарға да тиісінше жағдай жасалуы тиіс. Салық ко­ми­тетінде жұмыс істейтін қызмет­керлердің  біліктілігін арттыру да – күн тәртібіндегі мәселе.   
Басқосу барысында қыркүйектің 29-ы күні  өтетін салық форумына қатысты да әң­­гіме қозғалды. Осымен төртінші жыл ұйымдастырылып отырған бұл жиын биыл «Жаһандық экономикалық дағ­дарыс жағдайында ҚР жаңа Салық ко­­дек­сін пайдаланудағы тәжірибе» та­қы­­рыбымен өтеді. Сөз алғандардың ай­­­ту­ын­ша,  қазірдің өзінде біздің жаңа Салық кодексіміз әлемнің көптеген ел­дерін өзіне тартып отыр. «Біздің мемлекет өзінің салық заңнамасын ырықтандыру бойынша нақты шаралар қабылдады. Көп­теген елдер Қазақстанның Салық ко­дексін жоғары бағалады. Тіпті олар оф­фшорлық дағдарыс жағдайында Қа­зақстанды «жаңа оффшор» деп атады», – дейді А.Бикебаев.