Шашқа гель жағуға бола ма? Гель дәретке кедергі емес пе?
Сұрақ: Сәлеметсіз бе! Шашқа гель немесе воск жағуға бола ма? Дәрет алғанда, намаз оқығанда кедергі болмай ма? Гельдің құрамында алкоголь болса, ештеме етпейді ме?
2.Сұрақ: Ассаләмуғалейкум! Шашқа жағатын гель құрамында Alcohol denat деген жазу бар екен. Бұл дәретке әсер ете ме? Ермұрат Назарұлы
Уағалейкумәссәләм уә рахматуллаһи уә бәракәтуһ!
Риуаяттарға қарағанда Пайғамбарымыз (с.а.у.) қоштасу қажылығында ихрамды киместен бұрын шашына бал жағып қатырған екен. Бұған қатысты сахаба Абдулла ибн Омардың (р.а.) мына бір сөзі риуаят етіледі: «Пайғамбарымыз (с.а.у.) шашына бал жағып, қатырған еді»[1]. Осы хадиске қарай отырып, жалпы алғанда шашты ретке келтіру үшін арнайы гельдерді пайдаланудың ағаттығы жоқ деуге негіз бар. (Спирт нәжіс боп саналмайтындықтан сыртқы қолданысқа қолдануға рұқсат).
Дегенмен де, гель жағылған жағдайда шашта дымқылдық өткізбес қатпар пайда болуы ықтимал екендігін ескерткен кейбір дін мамандары шашқа жағылған гелдің дәретке кедергі келтіруі мүмкін екендігін тілге тиек етеді. Себебі басты сипағанда (мәсих тартқанда) қолдағы дымқылдық (ең кемі үш саусақ көлеміндей жерге) тию тиіс. Оның үстіне құрамындағы желатиннің де түбі неден жасалғандығы нақты білінбегендіктен, таза екендігінде күмән бар дейді олар (себебі доңыз майынан жасалған желатин нәжіс).
[1] Әбу дәуід: Сүнән; әл-Хаким: әл-Мүстәдрак.
Абдусамат Қасым
