Оразаны қандай амалдар бұзады?
Ораза ауыз, мұрын және құлақ сияқты табиғи жолмен асқазанға және миға ас-су, дәрі-дәрмек және т.б. заттар енумен бұзылады. Сонымен бірге, әл-күш беретін қан тамыр арқылы егілген дәрі-дәрмек. Сондай-ақ, жыныстық қатынас.
Ал, енді аздап кеңірек айтар болса, оразаны төмендегі амалдар бұзады:
1. Әйелін сүю, аймалау немесе құшақтау арқылы бойынан ұрық шықса;
2. Ноқат дәнді, тасты немесе темірді жұтса;
3. Клизма қою, темекі мен насыбай ату;
4. Құлаққа дәрі тамызу;
5. Қарынның асқазанмен байланысы бар жарақатына немесе бастың мимен байланысы бар жарақатына сұйық дәрі құю. Дәрі асқазанға немесе миға барса, ораза бұзылады;
6. Таң атпады деп сәресі ішуді жалғастырып, кейіннен таң атып кеткені белгілі болса;
7. Күн батты деп ауыз ашып, артынан күн батпағаны мәлім болса. Жоғарыда аталған жағдайда ораза бұзылады және қазасы өтелуі керек[1].
Еріксіз құсу және өзін мәжбүрлеп құстыру оразаны бұза ма?
- Еріксіз құсса ораза бұзылмайды. Ал, әдейілеп өзін құстырса және аузы толып құсса, оразаның қазасын өтеуі қажет.
Қандай жағдайда оразаның қазасымен қоса кәффаратын да өтеу қажет?
- Келесі жағдайларда оразаның қазасы және каффараты бірге өтеуі керек:
1. Әйелімен әдейі жыныстық қатынасқа түссе;
2. Қорек немесе ем болатын тағам немесе дәрі-дәрмекті қасақана ішіп-жесе.
Бұл жағдайда ораза бұзылады. Және оразаның қазасымен қатар кәффараты да өтелуі парыз болады.
Кәффарат деген не?
- Кәффарат – бір құлды азат ету. Бұған шамасы келмейтін адам қатарынан арасын үзбей екі ай ораза тұтып беруі тиіс. Оған шамасы келмесе алпыс мұқтажды тамақтандыруы керек.
Рамазан оразасынан басқа оразаларды бұзған кісіге де кәффарат өтеуі міндет пе?
- Рамазан оразасынан басқа уәжіп немесе нәпіл оразаларды бұзған кісі кәффарат өтемейді. Тіпті, рамазан қазасын бұзса да. Тек оразаның қазасын өтеумен шектеледі.
Оразаны не нәрсе бұзбайды?
Төмендегі амалдар оразаны бұзбайды:
1. Ұмытып тамақтану, сусын ішу және жыныстық қатынас жасау;
2. Ораза тұтушы ұйықтап жатып бойынан ұрық кетсе;
3. Әйелге қарап бойынан ұрық кетсе;
4. Аяқ-қолына және денесіне май (крем) жағу;
5.Қан алдыру (хижама), көзіне сүрме жағу;
6. Әйелін сүйсе, бірақ бойынан ұрық шықпаса[2].
