Дініміз қандай жағдайда әйелдің жұмыс істеуіне рұқсат береді?
Неке (үйлену) – әрі еркекті, әрі әйелді бақытты қылатын киелі одақ. Мамандардың айтуынша: «Депрессияға түскен әйелді айықтыру үшін оны тұрмысқа беріп, балалы болуына жол ашу керек. Ер кісіні де бақытты қылу үшін дәл осы шараны қолдану қажет.»
Қазіргі таңда, әсіресе батыс елдерінде, адамның жәннаты деуге болатын жанұя, яғни бақытты отбасы бұзылуда. Әйел күнде жұмысқа сыртқа шыққан кезде, өзінен бастап балаларына дейін барлық жанұя мүшелерін бақытсыз етуде.
Әйел онсыз да әлсіз және нәзік жаратылыс. Үйдің жұмыстары және балалардың тәрбиесі жетіп тұрғанда, тағы сыртқа жұмысқа шығуы, кәсіп иесі болып жұмыс істеуі оны әбден шаршатып, бақытынан айыруда.
Жұмыс істейтін ана таңертең балаларын тастап жұмысқа шығарда өзін кінәлі сезінеді. Қазіргі замандағы әйелдердің отбасын құрудан қашуының, бәлкім, ең үлкен себептерінің бірі осы болар.
Ананың күнде үйінен жұмысқа шығуының кесірінен пайда болған маңызды мәселелердің бірі – балаларының қажетті қамқорлық пен мейірімнен мақрұм қалуы. Балалар азыққа қалай мұқтаж болса, ана қамқорлығына да солай мұқтаж.
Көбісі «әйелдер ақша табу, осылайша жанұясын қажетті заттармен қамтамасыз ету үшін жұмыс істейді» деп ойлайды. Алайда, жасалған сауалнаманың қорытындысы бойынша, жұмыс істейтін аналардың 84 пайызының негізгі мақсаты ақша табу емес, оқып алған дипломын ақтау және мамандығын қолдана алу арманын орындау.
Дініміз әйелдің жұмыс істеуіне белгілі шарттарда және зәру жағдайларда рұқсат береді. Жанұяның, бала-шағаның напақасын (азығын, киімін, баспанасын және т.б.) қамтамасыз етуді үйдің еркегіне парыз қылды. Еркектер әйелдерден күштірек болып жаратылған. Еркектердің міндеті – ақша табу, жұбайының және бала-шағасының күнкөрісіне қажетті заттарды қамтамасыз ету. Ал әйелдің ең маңызды міндеті – үйінде үйдің жұмыстарымен және балаларының тәрбиесімен айналысу. Әйелдер еркектерге қарағанда мейірімдірек, биязы және сезімтал келеді. Еркектер үйдің ішіндегі жұмыстарды әйелдері сияқты жақсы атқара алмағанындай, әйелдер де сыртта жұмыс істеу тұрғысында еркектер сияқты бейім бола алмайды. Әйел жұмыс орындарындағы жұмысына қанша берілуге тырысса да, үй жұмыстарының өзіне тән екендігін жоққа шығара алмайды. Ол үйдің мәселелеріне жұмыстағысына қарағанда көбірек мән береді.
Еркек пен әйелдің құқықтары тең, бірақ жаратылыста екеуі тең емес. Екеуінің табиғаты өзгеше. Олар бір-біріне мұқтаж, бірі болмаса екіншісі нұқсан қалатын болмыстар. Яғни олар жанұяда бірігіп, бірін-бірі толықтыратын, екі жарты бір бүтін болатын өзгеше жаратылыстар.
Жақсы отбасы әрі еркекті, әрі әйелді бақытты қылатын, шаттық пен ырыс беретін одақ. Осы бақыттың тұрақты болуы үшін әйелдерге артық жүк бермеген жөн...
