100 жастағы зейнеткер ұзақ өмір сүрудің сырымен бөлісті
Ұлыбритания тұрғыны 100 жылдық мерейтойын атап өтіп, ұзақ әрі белсенді өмір сүрудің сырымен бөлісті. Бұл туралы Hartlepool Mail хабарлады.
Хильда Магуайр атаулы күнді 9 желтоқсанда Англияның Хартлпул қаласында, Дарем округінде атап өтті. Зейнеткерді құттықтауға төрт баласы отбасымен келді.
Магуайр саяхаттауды және музыканы жақсы көреді. Сондай-ақ өлең жазады және 90 жастан асқанда испан тілін үйрене бастаған, тіпті осы пәннен емтихан да тапсырып үлгерген.
Ұзақ өмір сүруінің сыры неде деп сұрағанда, әйел: "Дұрыс тамақтану, жақсы ұйқы, жақсы достар және адамдармен көп тілдесу", - деп жауап берді.
Екінші дүниежүзілік соғыс кезінде Магуайр кеңес әскері үшін қару-жарақтар құрастырып, көп жылдардан кейін туған қаласындағы Siemens зауытында жұмыс істеген.
Сонымен қатар ол Гонконг, Париж, Оңтүстік Африка және т.б. көптеген елді аралаған.
Бұған дейін тағы бір британдық әйел өзінің 105 жылдығын атап өтіп, ұзақ өмір сүруінің сырын ашқан болатын. Әйел үнемі спортпен айналысып, алкоголь ішпегендіктен, ұзақ өмір сүрдім деп санайды.
stan.kz
