Ұлттық әуенге ұйытқан үш қыз

Жақында Ғалымдар үйінде Жетісудың жыр-термесі шырқалды. «Кербез Жетісудың кермарал әуендері» деген кешті өткізген – Құрманғазы атындағы Қазақ ұлттық консерваториясының қабырғасында тәлім алып жүрген Әйгерім Нартүйеева, Гүлім Алшынова,  Мақпал Тоқтағанова сынды қазақтың жезтаңдай үш қызы.
Ә, дегеннен кеш тізгінін қолына алған белгілі сатирик Толымбек Әлімбекұлы: «Қазақ қыздары қашан да өжет. Құртқа, Ұлбике, Әлия, Мәншүктерден жалғасқан ержүректік мінезбен бүгін қаршадай ғана үш қыз тырнақалды концерт беруге ниеттеніпті», – деп бастады.
Ақын-жазушылар жер жәннатына ба­лаған Жетісудың табиғаты қандай көр­кем де сұлу болса, бұл өлкенің әндері де сондай әдемі әрі назды. Иірім-қайы­рымы айтуға жеңіл, құлаққа жағымды естілетін кермаралдай керілген сұлу мекен әндері қыздардың санасында бала күн­дерінен сайрап тұр. Құрманғазы атындағы Қазақ ұлттық консерва­ториясының қабыр­ға­сында тәлім алып жүрген Әйгерім, Гүлім, Мақпалдың ән әлеміне қанат қағуы кез­дейсоқ емес. «Жан серігім – домбыра» деп бес-алты жасынан ән айтқан қыз­­­­­дар­дың ауылда туып-өсуі ұлттық өнерді бойына сіңіруіне сеп болған.
Ұлттық музыкаға қолғабыс етіп, әнші қыздардың алғашқы қадамдарына сәттілік тілеген Ғалымдар үйінің директоры, ұлт­тық өнердің жанашыры Ғайникен Биба­тыроваға әншілердің айтар алғысы шексіз. Әділбек Тәшімов пен Жігер Бертісов құр­быларының кешін күй тар­тыспен дүріл­детсе, Ерлан Рысқали әннен шашу шаш­ты.