Махамбет Өтемісов атындағы Батыс Қазақстан мемлекеттік университетінде Батыс Қазақстан облыстық тілдерді дамыту басқармасының тапсырысымен жүзеге асырылған «Балалар үйінде, балабақша және мектеп бүлдіршіндерінің арасында мемлекеттік тілді, ұлттық салт-дәстүрлерді дәріптеуге бағытталған іс шаралар өткізу» атты жоба жұмысының орындалуын қорытындылау мақсатында кездесу кеші өтті.
Аталмыш шараға БҚМУ ректоры Асхат Иманғалиев бастаған ғылыми кеңес мүшелері, облыстық тілдерді дамыту басқармасының бастығы Махамбет Ихсанғали мен Жомарт Ерназаров және осы жобаны бірлесе атқарған университет ғалымдары қатысты. Кездесу кешіне ақын, Халықаралық «Алаш» әдеби сыйлығының лауреаты Ақұштап Бақтыгереева мен ақын, аудармашы, тіл жанашыры Қайрат Жұмағалиев арнайы шақырылды.
Университет қабырғасында қазақ жастарын ұлттық дәстүрді сақтауға, өз елінің тарихын білуге, мемлекеттік тілді игеруге, халық батырларының тарихи ерекшеліктерін түсінуге тәрбиелеу, жас ұрпақтың ұлттық тәлім-тәрбиенің ықпалымен рухани жетілуіне әсер ету мақсатымен «Қыздар әлемі» порталы ашылған болатын. Аталған жоба аясында бірнеше тақырыпта тәрбие сағаттары дайындалып, олардың электронды нұсқалары шықты. Тәрбие сағаттары қаладағы мектептермен бірге облыстық отбасы үлгісіндегі балалар ауылында және әдістемелік құралдар дайындалып, «Қыздар әлемі» порталының жұмысы толықтай таныстырылды. Осы жобаға басшылық жасаған БҚМУ доценті Айгүл Медешова жоба барысынан толықтай мағлұмат берді. Жоба жетекшісі алдағы уақытта музыкалық этнография, көркем әдеби шығармалар қосу, интерактивтілікті күшейту жұмыстары жүргізілетінін айтып өтті.
Ақұштап Бақтыгереева, ақын:
– Мен бұл тақырыпты жырладым, әлі жырлап келемін. Біреулер ақындар үшін ұсақ тақырып деп қарауы мүмкін. Бірақ бұл – тақырыптың ауқымы өте кең, үлкен қоғамдық проблема. Біздер өз өлеңдеріміз арқылы қыздарымызға ұлттық тәрбие беруге тырысамыз. Өйткені ұлт діңгегі – ұлттық тәрбиеде. Қазақ қызы тәрбие бастауын ана сүтінен алады. Қазақ әйелі қазақ қызына өнегелі тәрбие берсе, қазақ қызы қазақ қоғамының тірегі болары анық. Қыздары мықты болмай, қоғам мықты болмайды деген ойдамын.
Кешті қорытындылаған университет ректоры Асхат Сәлімұлы бұл жобаның БҚМУ базасында жүргізілуі үлкен мәртебе екенін, өйткені облыстық педагогикалық тәжірибесі мол ғалымдар басшылық етіп отырған шаралар инновациялық тұрғыдан оздырылуы тиістігін, жаңашылдыққа бет бұрып, болашақ педагогтерді тәрбиелеп отырған ұжым үшін маңызы зор екенін ерекше атап өтті.
Рита Сұлтанғалиева, М. Өтемісов атындағы БҚМУ-дың қауымдастырылған профессоры