Таңдаулы туындылар көрмесі

Алматыдағы Орталық мұражайда «XX ғасыр. Суретшілер туындыларын­дағы дәстүрлі қазақ мәдениеті. Мемлекеттік орталық мұражай коллек­ция­сынан» атты көрме жүріп жатыр.
Осынау мәдени-көпшілік шараның басты мақсаты – Орталық мұражайдағы «Бейнелеу өнері» қорының негізінде тұң­ғыш рет ауқымды түрде этнографиялық сюжетке бай, тарихи танымдық тағылымы айрықша көркемөнер туындыларын жұрт­шылыққа паш ету. Көрмеде осы уа­қыт­қа дейін ел назарына ұсынылмаған ерекше туындылар жинақталған. Қазіргі уақытта бұл қорда көрнекті қылқалам ше­берлері Н.Хлудовтың жұмыстарынан бастап, Ә.Қастеев, Ф. Болкоев, Б. Урманче, В.Кап­терев, Қ.Телжанов,  М.Қалымов, М.Кен­баев, С.Айтбаев, У.Әжиев, О.Нұр­жұ­маев және т.б. көптеген танымал автор­лардың жұмыстары қордың коллекциясы­ның қа­лып­тасуының өзегін құрап отыр. Көрмеге осы жоғарыда аталған қылқалам шебер­лерінің дәстүрлі мәдениет тақыры­бындағы еңбектері қойылған. Қазақы салт-дәстү­ріміз бен ұлттық құндылықта­рымызды насихаттауға бағытталған көрме жұмысы 5-сәуірге дейін жалғаса­ды.
Бейбітқали ҚАҚАБАЕВ, ҚР Мемлекеттік орталық мұражайы директорының бірінші орынбасары:
– Мемлекеттік орталық мұражайдың «Бейнелеу өнері» қорында халқымыздың тарихын, салт-дәстүрі мен әдет-ғұрпын, материалдық мәдениетін бейнелейтін 3500-ден астам көркемсурет туындылары мен кескіндемелері сақтаулы. Мұражай топтамасында этнографиялық мәлімет көзі болып табылатын көркемөнер туындыларының мол шоғыры топтасқан. Көрмеге топтамадағы ең бірегейлері ғана іріктеліп алынды.