Сыр өңірінің бас шаһары Қызылорда қаласында «Сыр сүлейлері» аллеясы ашылды. Өнерлі өлкенің өрісін ашқан бұл жағымды жаңалық көпшіліктің көзайымына айналып үлгерді.
Былайғы жұрт «Сыр елі – жыр елі» дегенді бекер айтпаса керек-ті. Расында да, қазақылық қаймағы бұзылмаған өңірде ерте кезеңнен ұлтымыздың ұлық тұтқан өнері – жыр мен термеге ерекше мән берілген. Аңызға толы даланың абызы атанған Қорқыт атадан бастау алатын сол өнер әлі күнге дейін ұрпақтан-ұрпаққа ұмытылмай, өзінің лайықты жалғасын тауып келеді. Бүгінгі күні де дария бойындағы қайсыбір қонысқа ат басын бұра қалсаңыз, қазақтың қоңыр үні секілді домбыраны қолға алып, ән мен жырдың тиегін ағытатын азаматтар аз емес. Ендеше, ертеден бастау алған сол өнердің дара тұлғаларына арнайы ескерткіш қою өздігінен сұранып тұрған мәселенің бірі еді.
Аллеяның қақ ортасында ескерткіш бой көтерген. Онда қобыз бен домбыра бейнесіне қосақталған қалам мен найза орнатылған. Оның өзіндік мәні бар. Дария бойы жаугершілік замандарда қолына найза ұстап, қас дұшпанына қарсы шыққан батырлар мекені екені белгілі. Ал жыраулар сол баһадүр жандардың жігерін жанып, қайратына қайрат қосып, елдің тыныштығы мен бірлігін сақтауға күш салды. Ескерткіштің қос қанатында Сыр елі мен оның бойындағы тарихи астаналар жайлы жазылған. Күй атасы – Қорқыт пен қазақ ауыз әдебиетінің жанрлары туралы, «жыршы», «сүлей» ұғымдарына түсінік берілген. Ескерткіштің авторлары – Аманкелді Кененбаев, Мұрат Сыдықов және Сейіт Мәкібаев. Аллеяны аралап шықсаңыз, Сыр өнері мен мәдениеті жайында толық мағлұмат алуға болады.
Берік ЖҮСІПОВ, Қызылорда облыстық мәдениет басқармасының бастығы:
– Әлімсақтан бері жыршылық өнерді дәріптеген Сыр өңірінде 500-ден астам сондай тұлға бар. Әрине, оның бәрінің есімін ескерткішке жазып шығу мүмкін де емес. Бұл – атадан аманатқа айналған ұлық өнердің бағасын арттырған әрбір өнер иесіне деген құрмет.
«Сыр сүлейлері» аллеясы ашылды
Последние статьи автора