SMS арқылы жұлдыз жасауға қарсымын

Нұржамал Үсенбаева, ҚР халық әртісі, Мемлекеттік сыйлықтың иегері:

Бір сәт
Сахнада өнер көрсетіп тұрған кезіңде құдіретті музыканың құшағына енген залды көріп керемет үйлесімділікті сезінесің. Менің вокалдан дәріс берген ұстазым КСРО халық әртісі Бекен Жылысбаев: «Сахнада суық ақыл, ыстық жүрек керек» деп шәкірттері – біздерге жиі айтудан жалықпайды. Салған әнің жүрегіңнен шықса, оны тыңдаушы да сезінеді. Жалпы, өнер адамына баға беретін халық. Халық көңілінен шықса өздері-ақ айтады. Мен өзіме әрқашан сыни көзбен қарап отыратын жанмын. Әншінің өзіне сын көзбен қарауы өз кезегінде әншінің дамуына жетелеп, тоқырауға жол бермейді.

 – Нұржамал Пернебек­қызы, жа­қында ғана шығармашылығыңыз­дың 25 жылдығына арнап репертуары бай концерт бердіңіз және өнердің шыңы  – операдағы орныңызды Пуччинидің «Богема» спектаклінде Мимидің рөлін сомдау арқылы көрсете білдіңіз. Сөз жоқ, бұл еңбегіңіздің барлығы Сіздің қазақ өнеріндегі биік тұлғаңызды айшық­тай түсті. Алайда бұл Сізге оңай­лықпен келмеді ғой...
– Өнердегі 25 жыл аз уақыт емес. Менің ойымша, дәл осы шамада сахна адамының деңгейін, дарынын барынша бағалауға мүмкіндік туады. Сондықтан халық ал­дындағы есеп беру концертімде мен өзімді концерт және опера әншісі ретіңде көрсетуді мақсат еттім. Осы мақсатта Ресейдің Үлкен театры мен Мариинский театрындағы әнші-әріптестеріммен бірле­сіп жұмыс істедік. Симфониялық оркес­трге итальяндық дирижер Вито Ло Ре жетекшілік етті. Өнердегі әріптестеріммен бірге алты тілде оперетта, мюзикл, поп-музыка жанрларында шырқадым. Ал Пуччинидің «Богемасына» келсек, ол – менің ең сүйікті, жаныма жақын опералардың ішіндегі бірегейі. Мимидің образы нәзіктілігімен, адалдылығы мен әсерлілігімен жаныммен үндес. Жалпы, үлкен концерттен бір күннен кейін  дауыс­тың демалуына мүмкіндік бермей Мимидің партиясын айтудың өзі менен көп еңбекті талап етті.
– Сіздің өнеріңізге аса риза болған Бибігүл Ахметқызының сазгер С.Мұха­­мед­жановтың «Дауыспен сим­фо­ния­лық оркестрге жазылған кон­церт» шығармасының нотасын бер­іп, оны репертуарыңызға енгізуді аманат­тағанына куә болған едік. Бұл шығар­маны Сіздің репертуарыңыздан қа­шан ести аламыз?
– Бибігүл Төлегенова – қазақтың атақ­ты әншісі. Ол кісінің қолынан нота алу мен үшін үлкен абырой әрі сенім. Әнші үшін ең қымбат сыйлық – ноталар. Осы мерейтойлық концерттерімнен кей­ін С.Мұхамеджановтың шығармасын иге­румен шұғылданатын боламын. Бибі­гүл Ахметқызы бұл шығарманы өнер­ге деген жанашырлықтан әрі маған сенгендіктен табыстап отыр. Сондықтан тыңдармандарымды көп күттіре қоймас­пын.
– Астана мен Алматыдан өзге өңірлерге опера секілді өнердің биік түрі жетпей жатыр. Халық әртісі ретінде еліміздің барлық облыс орта­лықтарында ғана емес, оның елді мекендеріндегі халықпен жүздесіп, өнер көрсеткім келеді деген тілегіңіз қаншалықты орындалып жатыр?
– Амандық болса сәуірдің 30-жұлдызында Астанада концерт бер­мекшімін. Оған менің Олег Кулько, Ахмед Агади деген достарым, дирижер Вито Ло Ре қатысатын болады. Астана төрінде ән шырқау – мен үшін құрмет әрі үлкен сынақ. Астананың мәдени өмірі өсіп, өркендеп келеді. Болашақта еліміздің өзге облыстары мен елді мекендерінде және Мәскеуде, басқа да шетел сахналарында концерт өткізбек ойым бар.
– Нұржамал, «Гәкку» әнін жас әнші Ерболат Құдайбергеновпен бір­ге шыр­қағаныңызды қарапайым көрер­мен қабылдай қоймаған секілді. Сіз­діңше, сол орындауда әннің құны түсіңкіреп кеткен жоқ па? Бұл туралы жалпы өзіңіздің пікіріңіз қандай? «Гәккуді» жаңа реңде сахнаға шығару идеясы кімнен туындады?
– «Сағындырған әндер-ай» фестива­лінің идеясы әншілерге бірлесіп ән салдырту еді. Ал «Гәккуді» сахнаға жаңа реңде шығару идеясы менен болды. Биыл «Қыз Жібек» эпосына 500 жыл толды. «Гәккудің» менің шығармашылығымда алатын орны ерекше. Ерболат – дарынды жас орындаушы. Маған жастардың өткен тарихқа бүгінгі көзбен қарауы қашанда маңызды. Көп адамдарға біздің бұл жобамыз ұнапты. Бұл жобаны ұрпақтар сабақтастығы деп қарауға болатын шығар
– Жақында «Хабар» және «Еларна» телеарналарының ұйымдастыруымен өткен «Қазақстан әйелдері» жобасын­да сіздің де есіміңіз аталды. Біз қа­зір жұлдыздарды sms-пен дауыс беру арқылы қолдан жасап алатын жағ­дайға жеттік. Өнерді бұлай баға­лау­ға сіздің көзқарасыңыз қандай?
– Ол конкурс әр түрлі жастағы әйел адамдардан құралған. Олардың арасында әлдеқашан қазақ әйелінің эталонына айналып үлгіргендер де, күні кеше таны­мал болғандар да болды. Меніңше, бәрін бір байқауға салып кеп жібермей, жас ерекшеліктеріне мән беру керек еді. SMS арқылы дауыс беруді де аса бір керемет әдіс дей алмас едім. Әсіресе, елімізге ғана емес алыс-жақын шетелдерге есімі мәшһүр болған тұлғаларды дауыс беру арқылы бағалауға тіптен қарсымын.
– Сіз – әлемнің ең атақты сахна­ларында ән шырқап, талайдың таң­дай­ын қақтырған әншісіз. Сізді әлем тани­ды және мойындайды. Мара­пат пен мадақ­тың сізден теріс айналып кеткені жоқ. Бірақ қанша қалағаны орындалса да, адам баласының көкейін­де бәрібір бір арман тұратыны анық. Атақты әнші ретінде нені ойлай­сыз, қарапайым әйел ретінде нені арман етесіз?
– Әнші ретінде өз армандарым, мақ­сат-жоспарларым бар. Ең бастысы, жұмысқа деген құлшынысымды жоғалтып алмауға жұмыстанамын. Арман жолы мен үшін әрқашан да маңызды. Мен – бақытты әйелмін. Тату отбасым бар. Бір өкініштісі, әрқайсысымыз әр қалада жүреміз де, жиі басымыз қосыла бермейді. Бәріміздің басымыз бір дастарқанда қосылған сәт –  мен үшін ең бақытты сәт.
– Әңгімеңізге рахмет.