Сіз кімсіз, Ка мырза?
«Кеше «Цезарь» кинотеатрында «Қазақфильм» мен «Изарусфильм» бірігіп түсірген жаңа қазақ киносының арнайы көрсетілімі болды. Басты рөлде Қазақстанның Халық әртісі Асанәлі Әшімов ойнайтын бұл фильм – есірткі әлемін құрықтау жайлы боевик жанрындағы тұңғыш қазақ туындысы. 
Режиссері – Қуат Ахметов, сценарийін жазған – Ермек Тұрсынов, ал музыкалық көркемдеуші – осыған дейін бірнеше қазақ киноларына әуен жазған атақты сазгер Қуат Шілдебаев.
«Сіз кімсіз, Ка мырза?» фильмін тақырыптық жағынан және басты рөлді сомдаушы Асанәлі Әшімов болғандықтан кеңестік кезеңнің сәтті туындылары – «Атаманның ақыры» мен «Транссібір экспресінің» жалғасы деуге болады.
Тай елінде түрмеде жатқан кәрі тарлан Ка мырзаның бойынан сол баяғы қазақтың Қасымхан Шадияровын табу қиын емес. Әжім түскен бет-жүзі мен ақ қырау шалған шашты уақыттың табы деп түсінсек, отты жанардың «әлі де талайға жараймын» дегенін оқу қиынға соқпайды.
Елге оралар жолдағы Ка мырза мен Игорьдің бастан кешкендері баяндалатын шытырман оқиғалы фильм 19 наурыз күні Астана қаласында, ал 21 маусым күні Алматыда «Алатау» кинотеатрында көпшілікке көрсетілмек. Фильм жайлы толық жазылған мақаланы газетіміздің келесі санынан оқи аласыздар.
