Елордада Қазақстанның халық жазушысы, Мемлекеттік сыйлықтың иегері Сәкен Жүніс тұрған үйдің қабырғасына арнайы ескерткіш-тақта орнатылды.
Осы орайда кеше зиялы қауым өкілдері қаламгер тұрған үйдің жанына жиналып, осы бір игілікті шараға қатысты. Ескерткіш-тақтаның ашылу рәсімінде қайраткер жазушының көзін көрген қаламдастары, әдебиеттегі өкшебасар іні-қарындастары мен жақын туыстары сөз сөйлеп, марқұм жайында жылы естеліктер айтты.
Нұрлан Оразалин, Қазақстан Жазушылар одағы басқармасының төрағасы:
– Сәкен сері Нұрмақұлы – ХХ ғасырдың екінші жартысындағы қазақ әдебиетіндегі аса көрнекті, миллиондардың жүрегінен ойып тұрып орын алған ұлы қаламгерлер шоғырының бір өкілі. Ол кісінің қаламынан туындаған эпикалық-прозалық туындылар, драмалық шығармалар – біздің өнерімізге, мәдениетімізге, сол санатта ұлттық әдебиетімізге олжа салған дүниелер. Сондықтан ресми орындардың, жалпы ордалы қауымның жазушының соңғы күндері өткен, тұрған үйіне осындай ескерткіш-тақта орнатып жатуы өнерге, әдебиетке, дарынға деген үлкен құрмет деп бағалаймыз.
Ерте жасынан-ақ Сәкен сері атанған қаламгер ұлт әдебиетінің жаңаша қалыптасып, дамуына өзіндік өлшеусіз үлесін қосқан. Жазушы кезінде «Қазақ әдебиеті» газетінің бөлім меңгерушісі, КСРО Әдеби қоры Қазақ бөлімшесінің директоры, Қазақстан Жазушылар одағының хатшысы қызметтерін абыроймен атқарған. Қаламгердің «Аманай мен Заманай» романы бойынша «Заманай» атты көркем фильм түсірілген. Оның «Ажар мен ажал», «Тұтқындар», «Жаралы гүлдер», «Қызым, саған айтамын», «Қос анар», «Әр үйдің еркесі», «Қысылғаннан қыз болдық», «Кроссворд», «Елім-ай», «Сабалақ Абылай», «Сәукеле» және тағы да басқа пьесалары республикалық және облыстық театрларда сахналанған. «Сонарда», «Әжем мен емші және дәрігер», «Кімнің мекені жақсы?» атты әңгімелер мен повестер жинағы, «Жапандағы жалғыз үй» , «Ақан сері» романдары жарық көрген. Көптеген шығармасы шетел тілдеріне аударылған.
Шараға қатысқан қаламгердің қарындасы Роза ханым ескерткіш-тақтаның ашылуы қазақ халқы үшін зор мәртебе екендігін айта келе, туған-туыстары атынан қала әкімдігі мен Қазақстан Жазушылар одағына алғысын жеткізді.