Оралдық оқырмандар Оралханды оқиды

Кітап оқуға деген қызығушылықты арттыруды көздейтін «Бір ел – бір кітап» акциясы биыл да жалғасын тапты. Оралдағы Ж. Молдағалиев атындағы облыстық ғылыми-әмбебап кітапхана мен М. Өтемісов атындағы Батыс Қазақстан мемлекеттік университеті осы шара шеңберінде көрнекті қаламгер, Мем­лекет­тік сыйлықтың лауреаты Оралхан Бөкейдің шығармаларына арналған оқырмандар конференциясын өткізді.
Конференцияда БҚМУ ғалымдарының осы туындыны ғылыми тұрғыдан жан-жақты талдаған баяндамалары тыңдалды. Әдебиеттанушы Серік­қали Шарабасовтың айтуынша, Қазақ елінде бұл шара 1914 жылдан бастау алған. Біздің еліміздегі алғашқы шараны 1914 жылы Нәзипа Құлжанова Абай шығармаларын дәріптеуге арнап өткізген екен. Ғалым баяндамасында биылғы жыл кітабы – «Қайдасың, қасқа құлыным?» жинағындағы шығармаларына талдау жасады. Университет до­центі, профессор Рита Сұлтанғалиева О. Бөкей шы­ғар­маларына талдау жасай отырып, қаламгер прозасындағы психологизмнің, шығар­ма­ла­рын­дағы мифтік сананың көрінісі, суреткердің фи­ло­софиялық тұжырымдарына тоқталды. «Бөкеевтің кейіпкерлері – жан дүниелері бай, рухани биік, бостандық сүйгіш, арманшыл, қиялшыл адамдар қатарынан, оларды бір-бірімен жалғастыратын ортақ қасиет – қиын-қыстау жағдай туса да, жаны мен арының ақтығын сақтап, адамдық қасиетін жоғалтпайтындығы. Оларды толғандыратын ортақ ойлар – адам болмысының құпиялылығы мен жұмбақтығы, рухтың мәңгілік мәселелері, рухани құндылықтар. Оралхан шығармалары роман­ти­ка­лық прозаның да үздік үлгісін көрсетеді», – дейді зерттеуші. Көркем әдебиеттің қадір-қасиетін дәріптеген оқырмандар конференциясында уни­вер­ситет студенттері Оралхан Бөкей прозасынан үзінділер оқыды. Ж.Молдағалиев атындағы облыс­тық ғылыми-әмбебап кітапхана атынан кон­фе­рен­ция қатысушыларына Алғыс хаттар мен Оралхан Бөкейдің кітаптары сыйға тартылды.
Ганмиркүн ТҰРҒАНАЛИЕВА, М.Өтемісов атындағы БҚМУ-дің магистр-оқытушысы