Міржақып мұражайы ашылды

Биыл Алаштың ардақтысы Міржақып Дулатовтың туғанына  125 жыл толды. Осы орайда, Қостанай қаласында М.Дулатов атындағы инженерлік-экономикалық университеттің негізінде ұлтым дегені үшін «ұлтшыл» атанып, арманда кеткен асыл арысымызға арналған мұражай ашылды. Бұл салтанатты рәсім «Дулатов оқулары – 2010» халықаралық конференциясымен жалғасты.
Алаш қайраткерінің «Оян, қазақ!» деп өксікпен өткен өмірін, шындықпен шың­дал­ған шығармашылығын, қиын-қыстау кезеңдегі қызметін саралаған конферен­цияны М.Дулатов атындағы ҚИЭУ-ның рек­торы, профессор Сәбит Есмұратов ашып, тарих ғылымының докторы, ҚР Президенті жанындағы мемлекет және құқық институ­тының профессоры Ханкелді Әбжанов, ҚР Президенті жанындағы Мемлекет басқару Академиясының профессоры Сейіл Байма­ғамбетов, ҚР Ғылым академиясының про­фессоры Виль Галиев және Ы.Алтынсарин атындағы Арқалық мемлекеттік педагоги­калық институты ректорының кеңесшісі, жазушы, этнограф Сейіт Кенжеахметұлы сынды елге елеулі зиялы қауым баяндама жасады. Ал Дулатов өмірінің қиын кезең­дері туралы сыр шерткен қаламгер, отстав­кадағы подполковник Ғалихан Мәулетовтің Ахаң мен Жақаңның ақталуы үшін тікелей еңбек еткен азаматтардың бірі болған­ды­ғын көпшілік ерекше ықыласпен қабылда­ды.
Жаңа ашылған мұражайда ақынның кеуде мүсіні, Торғайдағы мұражайдан әкелінген жәдігерлер көшірмелері, туған жеріне арнайы барып келген экспеди­ция­ның жұмыс нәтижесі және Жақаң жайлы естелік кітаптар жиналған жұрттың назары­на ұсынылды. Алдағы уақытта Қостанай өңірінен табылған Міржақып Дулатовқа қатысты құнды мұрағаттар осы мұражай­дың төрінен табылатын болады.