Мәуліт мерекесі атап өтілді

Өткен сенбі күні Алматыдағы Балуан Шолақ атындағы спорт кешенінде дәстүрге айналған асыл пайғамбары­мыз Мұхам­медтің (с.ғ.с) туған күні – Мәуліт мерекесіне байланысты имандылық кеші болып өтті.
Кешті Театр қайраткерлері одағының төрағасы, Қазақстанның Халық әртісі Тұңғышбай Жаманқұлов жүргізді. Шара­ның басында Құран оқылып, еліміздің бас мүфтиі Шейх мүфти Әбсаттар қажы Дербісәлі жиналған барша жұртшылықты осы атаулы мерекемен құттықтады. «Нұр Мүбарак» діни оқу орнының шәкірттері салауат айтып, жиналған қауым адамзат тарихында ең ұлы – сүйікті Пайғамбарымыз хазіреті Мұхаммед (с.ғ.с.) дүниеге келген Мәуліт күні жөнінде қызықты әңгімелерді тыңдады. Сарайға бұл күні 5 мыңнан астам адам жиналды және кешке кіру билеті халыққа тегін үлестірілді. Сондай-ақ әрбір келушіге Мұхитдин Исаұлының «Мәңгі мүғжиза», Алау Әбілдаевтың «Ке­мелдік кілті» атты екі кітап тегін тара­тыл­ды.
Кеште Ескендір Хасанғалиев, Алтынбек Қоразбаев сынды өнер саңлақтарымен қатар, Құдайбергеновтер отбасы, Балғын­бек Имашев, «Меломен» топтары да өнер көр­сетті.
Сонымен қатар М.Әуезов атындағы Қазақ мемлекеттік академиялық драма театрының әртістері мұсылман қа­уымға өздері дайындаған арнайы көрі­ністі ұсынды. Мәуліт мерекесін ерекше атап өтудегі негізгі мақсат – Мұхаммед (с.а.с.) пайғамбардың іс-әрекеттерін насихаттау, салауаттар айту, жастарға имандылық қа­ғидаттарын түсіндіру, оларды отан­сүйгіш­тікке, бауыр­малдыққа, адамгер­шілік­ке, ата-ананы құрметтеуге және түрлі теріс қылықтардан сақтануға ша­қыру. Қазіргі таңда рухани Мәуліт айы об­лы­сымыздың барлық ауданында жал­ға­сын табуда.