Қазақстанның Тәуелсіздік алғанына 18 жыл толғанда ғана теріскейде жатқан Қызылжарда азаттықтың лебі аз да болса сезіле бастағандай. Облыстық мәслихат ғимаратының алдындағы бұрын пролетариат көсемі Владимир Ленин тұрған алаңға еліміздің рәміздеріне арналған сәулеттік композиция қойылды.
Қызылжардың қақ ортасынан өтетін Ленин көшесі Қазақстан Конституциясы көшесі болып аталғанына да көп бола қойған жоқ. Енді осы көшенің бойындағы 1994 жылға дейін «күн көсемнің» ескерткіші тұрып, Лениннің атымен аталып келген алаң да қазаққа қайтты. Тәуелсіздік күні «Қазақстан Республикасының рәміздері» сәулеттік композициясын облыс әкімі Серік Біләлов ашты. Елтаңба, Туымыз бен Әнұранға ескерткіш орнату идеясы да – әкімдікі.
– Рәміздер – елдігіміздің, ұлттығымыздың белгісі. Тәуелсіз ел екенімізді барша әлемге паш етіп тұр. Ол әрбір қазақстандықтың жүрегіне отансүйгіштік сезім ұялатуы қажет. Сондықтан қаланың ортасына осындай сәулеттік композиция орнату идеясы келді. Бұл барлық мерекелік шаралар өтетін орын болады, – деді өңір басшысы ескерткіштің ашылу салтанатында сөйлеген сөзінде.
Сәулеттік композиция құрамына биіктігі 50 метр мұнараға ілінген көк байрақ және оны қанаттай орналасқан қос тақта енген. Тас тақталарда осыдан 18 жыл бұрын Тәуелсіздігін жариялаған Қазақстанның картасы, Ата заңымыз, ұлы халқымыздың кешегі тарихын бүгінгі күнмен жалғаған Алтын адам, «Астана-Бәйтерек» монументі қашалып бейнеленген. Жоба авторы – алматылық сәулетші Қазыбек Сатыбалдин.
Нұржан ӘШІМБЕТОВ, Петропавл қаласының әкімі:
– Сәулетшілер арасында байқау ұйымдастырдық. Барлығы жеті жоба келіп түсті. Комиссия солардың арасынан сәулетші Қазыбек Сатыбалдиннің жұмысын жоғары бағалап, таңдап алды. Сәулетшілер мен құрылысшылар екі айға жуық уақыт еңбектенді. Тудың көлемі – 9х4 метр. Биіктігі бойынша ол – қаладағы ең биігі.