Күлкілі сыйлық
Маусымның 6-сы күні елордадағы Жастар мәдениет сарайында оңтүстіктен шыққан әзілқойлар – «Шаншар», «Шымкент-шоу», «Нысана» театрлары бірлесіп, «Әзілің жарассын, Астана!» деген тақырыппен Астана жұртшылығына әдемі әзіл кешін сыйламақ. Дәл қазір аталған театр өнерпаздары Астананың туған күніне қызу дайындық үстінде.
Бүгінде түйдек-түйдек әзілдерімен халықты күлдіре отырып, жанды жерін уытты сөзбен түйреп түсер әзіл-оспақ отауларының арасында оңтүстіктен шыққан «Шаншар», «Шымкент-шоу», «Нысана» театрлары басқалардан оқ бойы озық тұр. Мұның өзіндік себебі де жоқ емес, өйткені аталған театрлардың қойылымдары дәл бүгінгі күннің проблемасын дөп басып көтеріп жүр десек, артық айтқандық емес. Жылда жаңа қойылымдарын көрермен асыға күтетін театрлар келесі маусымда да өткір тақырыптарды көтеріп, репертуарларын жаңартпақ ойда. Бұл туралы газетіміздің тұрақты оқырманы, «Шаншар» театрының директоры Уәлибек Әбдрайымов болашақ жоспарларымен бөліскен еді. «Шілдеден бастап, қыркүйекке дейін «Шаншар» театры демалып, күзде жаңа қойылымдарымен шығармашылық жұмыстарын одан әрі жалғастырмақ. Өткен маусымда көрерменнің есінде болар, біз «Ауылым – әнім» атты комедиялық қойылымды сахнаға алып шықтық. Одан кейін «Бозбойдақ» атты комедияны сахналадық. Қазіргі кезде қоғамдағы ең үлкен мәселенің бірі – отырып қалған кәрі қыздар жайы. Аталған қойылым осы тақырыпты қозғайды. Сондай-ақ ұжым болып «Кәрілігімді сағындым» деген қойылымды сәтті шығардық. Міне, «Шаншар» театры тек әзіл-сықақ қойылымдарын ғана емес, театр сахнасына арналған комедияларды халыққа ұсынуда. Сондай-ақ қазіргі кезде театрға көптеген жас дарынды актерлер ағылып келуде. Солардың арасынан нағыз талантты дегендерін таңдауға тырысып бағудамыз. Сәті түссе, болашақта көрермендеріміз «Шаншар» театрының құрамынан жаңа дарындарды, шебер актерлерді көретін болады», – дейді Уәлибек Әбдрайымов.
