Еркебұлан Дайыров Мәскеу халықаралық кинофестивалінде «Үздік актер» атанды
Қазақстандық режиссер Жасұлан Пошановтың «Шлагбаум» кинотуындысы Мәскеуде 37-ші рет өткен Халықаралық кинофестивальге қатысып, жүлделі оралды. Қазақстандық актер Еркебұлан Дайыров осы фильмдегі рөлі үшін «Үздік актер» номинациясының жеңімпазы атанды. Фильм режиссері Жасұлан Пошанов көпшілікке «Жұлдыздарға арналған коктейль-2» фильмі арқылы жақсы таныс. Айта кетейік, байқаудың жабылу салтанаты мен марапаттау рәсімі 26 маусым күні Мәскеудегі «Ресей» театрында өтті. Фестивальдің бас жүлдесін болгарлық «Лузеры» фильмінің авторлары жеңіп алса, ресейлік Елена Лядова «Үздік актриса», отандасымыз Еркебұлан Дайыров «Үздік актер» номинациясы бойынша жеңімпаз деп танылды. Айта кетейік, «Шлагбаум» фильмінің сюжеті өмірде болған оқиға желісімен түсірілген. Бұл туынды қазіргі қоғамда болып жатқан әлеуметтік мәселелерді көтереді. Драмада біздің қоғамның артықшылықтары мен кемшіліктері сөз болмақ. Сондай-ақ, қоғамдағы бай және кедей, ысырапшылдық пен жоқшылық тәрізді әртүрлі қарама-қайшылықтар да осы картинадан көрініс тапқан. Мәскеудегі халықаралық байқауға бірнеше елдің режиссерлері ұсынған 12 картина қатысты. Олардың үшеуі ресейлік мамандардың туындысы. Атап айтқанда, Андрей Прошкиннің «Орлеан» фильмі, Ирина Евтееваның «Арвентур» фильмі және Александр Миндадзенің «Сүйікті Ханс, қымбатты Петр» фильмдері байқауда бақ сынады. www.baq.kz
