Елорда тойына орай қазақы люстра жасалды

Үйіңізді самаладай жарқыратып тұрған аспалы шам-люстраңыз қай елдікі? Әлбетте, еуропалық немесе соның қытайлық баламасы болуы мүмкін. Солай болғасын, оның сән-сықпыты, яғни дизайны да шетелше болатыны белгілі. Басқасы табылмады дерсіз, қынжылып. Бірақ бұған қам жемеңіз, алдағы уақытта қазақстандық үлгідегі, ұлттық нақыштағы люстраларға да ие болып қаласыз.
Алматылық кәсіпкер Мейрам Қабдырахман қа­зақ­тың киіз үйінің шаңырағы дизайнымен әдемі люстра­лар жасау ісін қолға алыпты. «Алаш айнасы» газе­тінің Астана бюросына осы ұлттық нақыштағы люстра-шамдарының алғашқы үлгілерін ала келген Мейрам Қабдырахман мырза бұл жаңалығын «елорда мерекесіне орай жасаған тартуым» дейді. Өзінің айтуынша, қазіргі нарықта мұндай ұлттық нақыштағы, жо­ғары сапалы люстралар мүлде жоқ. Расында да со­лай, мұны өзіміз де байқап жүрміз. Сондықтан на­рықты сүзіп көрген кәсіпкер әр қазақтың үйінде киіз үйдің қасиетті шаңырағы тұрсын деген оймен осы люстра-шамдарды жасауға бел буыпты. «Әзірге ши­кізаты мен бұйымдарын әшекейлеу, әртүрлі түспен аптау, құрастыру ісін Қытайдағы кәсіпорындармен ке­лі­сіп істеп отырмын. Алла жазса, бұл істі қазақтың қа­ра шаңырағы, ел ордасы – Астанада жолға қойсам де­ген ниеттемін», – дейді М.Қабдырахман.
Р.S. Жаңалық жерде жатпайды. Жерлесіміздің осы жаңалығын естіген қырғыз ағайындар дереу қолқа салыпты. «Алатаудың қос бөктерін қатар жайлаған бауырлас елміз, киіз үйдің шаңырағы қазақ-қырғызға бірдей ортақ. Сондықтан бұл істі бірлесіп істейік» деп жатқан көрінеді айырқалпақты кәсіпкерлер.