Достық символы
«Отан-Ана» – қастерлі ұғым. Бойына сан түрлі сыр жасырған символ. Монументтегі кимешек киген ана қолында алтын тостаған. 
Бұл бейне қазақтың қонақжай, дарқан мінезін сомдайды. Кім келсе де, қолына ас-суын ұстап қарсы алатын қазақ осы уақытқа дейін қаншама ұлттар мен ұлыстарды құшақ жая қарсы алып, бауырына тартты. Бұл монумент – осының айғағы. Ал стелланың ұшар басындағы 101 масақ – қазақ даласындағы өзге ұлттардың саны. Сол масақтардың бір құшақ болып жайылуы еліміздегі халықтар бірлестігінен хабар береді. Стелланың ұзындығы – 40 метр.
Монументтің екі жағында барельеф бар. Оң жағында кеңестік кезеңдегі, сол жағында хандық дәуірдегі қазақ батырлары бедерленген. Тәуелсіздік батырларымыздың қанымен, маңдай терімен, пида болған жанымен келгенін ұмытпасын дегеннен сыр шертеді.
Монументтің алдында мәңгілік от алауы жанып тұр.
