Дос болу – үлкен жауапкершілік
Бүгін – Халықаралық достар күні. Бұл күн – шынайы достардың күйбең тіршілікте бір уақ бір-бірін еске алып, құттықтауы үшін белгіленген мереке. Осы мейрамды пайдаланып, біраз уақыттан бері кездесе алмай, басқосуға уақыттың ыңғайы келмей жүрген достар жиналып, өткен-кеткенді еске алуларына мүмкіндік туады. Достық – адами сезімдердің ең биігі. Дос бола білу – үлкен жауапкершілік. Достық жайлы әркімнің пікірі әрқилы. Осындай пікірлердің бірнешеуіне назар салып көрейікші. Мүмкін сіздің де достық туралы ойыңыз төмендегі пікірлерімен тоғысып қалар...
Тұңғышбай әл-ТАРАЗИ, ҚР халық әртісі:
– Достық пен махаббат – Алла Тағаладан келетін қасиет қой. Мен шын достық пен шын махаббатты айтамын. Әйтпесе, қазіргі кездері тарысы піскен жердің тауық-достары, есепті күйеу мен төсекті жарлар жетіп артылады ғой. Достың үш түрі болады дейтін менің атам Жаманқұл-рахымелі, ол – тұмсықтан қан шыққанша, қалтадан мал шыққанша, кеудеден жан шыққанша. Ал өнерден дос табу мүмкін емес екен. Осы тұрғыдан келгенде, менің достыққа деген талабым тым биікте, махаббат жайлы пікірім тіпті аспанда!
Әзімбай ҒАЛИ, саясаттанушы:
– Меніңше, жас кезде ерлік жасауға да, қылмысқа да, ұрлыққа да бірге баратын сенімді достар көп болады. Менің де жас кезімде достарым көп болатын. Жасым ұлғая келе, бірте-бірте достарым азайды. Қазір бір ғана досым бар. Атын айтсам, одан да айырылып қалам ба деген қаупім бар. Кей достарым үлкен бастық болып, шенге ие болғанда олардан көңілім қалды. Басшы достармен дос болудан өзім бас тарттым. Мен өз басым орыстілді қазақтармен дос болдым. Олардың тілге, басқа да мәселелерге байланысты қате позицияларын айтам деп, дос емес, жауға айналдым. Сондықтан достарды өмір өзі іріктеп береді деп ойлаймын.
Уәлибек ӘБДІРАЙЫМОВ, сатирик:
– Егер мың досың болса, бұл аз. Бір дұшпаның болса, бұл көп. Сондықтан достың көп болғаны жақсы. Достықтың екі түрі болады. Бірі – адал достық, екіншісі – амал достық. Адал достық өмірлік нұсқа болады, амал достықтың өрісі қысқа болады. Достардың арасында ешқашан жалған әңгіме, өтірік болмау керек. Менің достарым көп және мен достарыммен мақтанамын. Мектептегі және студенттік кездегі достарыммен әлі күнге дейін араласып тұрамын. Достарыма барынша адал болуға, қуанышына қуанып, қайғысына ортақтасуға тырысамын.
