Бүлдіршіндер балабақшамен қоштасты
Алматы қаласы Жетісу ауданына қарасты №67 «Бөбекжай» балабақшасында «Қош бол, балабақша!» атты бүлдіршіндердің салтанатты кеші болып өтті. Оған бір топ ата-аналар қатысып, шағын концерттік бағдарлама ұсынылды.
Мектеп табалдырығын аттағалы отырған балалардың балабақшамен қоштасу шарасында бүлдіршіндер өлең оқып, ән салып, би билеп, өз өнерлерін ортаға салды. Балабақша меңгерушісі Анаргүл Қыдырбаева балаларға өзінің ыстық ықыласын білдіріп, ақ жол тіледі. Сондай-ақ, кешке қатысқан ата-аналар да өз тараптарынан тәрбиешілерге алғыстарын айтып, шексіз ризашылықтарын білдірді.
Анаргүл ҚЫДЫРБАЕВА, №67 «Бөбекжай» балабақшасының меңгерушісі:
— Биыл біз 60 түлекті мектеп табалдырығына аттандырып отырмыз. Осындағы Ләззат Гилманова сынды үздік тәрбиешілердің арқасында бүлдіршіндеріміз білімді, өнерлі, зерек болып өсті. Ендігі менің тілегім, балалар әрі қарай 4 пен 5-ке оқып, ата-аналарын қуантып, үлкен азамат болып өссе екен деймін. Бастарына бақ қонып, еліміздің үміт ақтар ұл мен қыздары болуларына тілектеспін.
Маржан ЕСМАҒАМБЕТОВА, ата-ана:
— Менің ұлым да, қызым да осы балабақшада тәрбиеленіп жатыр. Қызым «Балдырған» тобында болса, ұлым — «Қарлығаш» тобында. Бүгін ұлым балабақшамен қоштасып, мектеп табалдырығына аттайын деп отыр. Бүлдіршіндерді осылай ұлтжандылыққа, отансүйгіштікке тәрбиелеген балабақша тәрбиешілеріне алғысым шексіз.
Осылайша, балаларымыз мектеп табалдырығын аттамақ. Салтанатты кеште әр бүлдіршіннің көзі жайнап, қуаныштарында шек болмай тұрғаны көрініп тұрды. Ендеше біз де балалардың мектеп табалдырығына аттауына сәттілік тілеп, білімді болып, еліміздің ертеңгі тұтқа ұстар азаматтары болуына тілектеспіз.
