"Алғысымыз шексіз": Нұрсұлтан Назарбаев "МузАРТ" тобын құттықтады
2021 жылы "МузАРТ" тобы жиырма жылдық мерейтойын атап өтіп жатыр
Тұңғыш президент - Елбасы Нұрсұлтан Назарбаев "МузАРТ" тобын 20 жылдық мерейтойымен құттықтады. Бұл туралы топ мүшесі Сәкен Майғазиев әлеуметтік желідегі парақшасында бөлісті.
Мәдениет және өнер қызметкерлері күніне орай өткен салтанатты шарада мәдениет және спорт министрі Ақтоты Райымқұлова "МузАРТ" тобын 20 жылдық мерейтойымен құттықтап, оларға Нұрсұлтан Назарбаевтың құттықтау хатын табыс етті.
"Сіздерді 20 жылдық мерейлі белестеріңізбен құттықтаймын! Табиғи талант пен талғамның, табанды ізденіс пен еңбектің арқасында көпшілік сүйіп тыңдайтын, кеңінен танымал ансамбльге, күллі жұрттың көзайымына айналу - зор жетістік. Алдағы уақытта да өнерлеріңіз өрістей берсін. Мықты денсаулық, шығармашылық жаңа табыстар тілеймін!", - деп жазылған Елбасының құттықтау хатында.
Топ әншісі Сәкен Майғазиев қазақ халқына шексіз алғысын жеткізді.
"Құттықтауларыңызға мың алғыс, ардақтыларым! Сіздерге де, ұрпақтарыңызға да жақсы жетістіктерге жету, мемлекет басшысы қолынан марапат алу нәсіп болсын", - деп жазды әнші.
МузАРТ тобы 2001 жылдың сәуір айында құрылған. Қазір топ құрамындағы әншілер - Сәкен Майғазиев, Мейрамбек Бесбаев және Кенжебек Жанәбілов.
