«Алашұлы» тобы Қазақстанды тәрк етпек (фото)

«Алашұлы» тобы Қазақстанды тәрк етпек. Алдағы дүйсенбіде трио Башқұртстанға ұшып кетеді. Бірақ біржола кетпек емес. Бұл туралы Gakku телеарнасына сілтеме жасаған «Алаш айнасы» хабарлайды.
«Алашұлы» тобы Башқұртстанда алғаш рет өтетін этно-фестивальге қатысады екен. «Этно-фестивальге барлық түрік тілдес елдерден өнер ұжымдары қатысады. Олардың бізді шақыру себебінің бірі, ол жақта бізді сүйіп тыңдайды және жергілікті телеарналардан біздің бейнебаяндарымыз жиі көрсетіледі екен» дейді жігіттер.
Трио ол жаққа бір ғана әнмен емес, бір концертке азық болатындай бағдарламамен бара жатқан көрінеді.
«Біздің репертуарымыз кең. Уфада болатын концертке сегіз композицияны таңдап алдық. Соның бірі - «Гиккай». Бұл мүлде жаңа композиция.
Бір өкініштісі Башқұртстанда өтетін этно-фестивальді біздің телеарналар көрсетпейді. Әйтсе де, жігіттер бұл тығырықтан шығар жол тауыпты.
«Концерт 27 қазанда өтеді. Өкінішке қарай біздің елдің аумағында ол концерт көрсетілмейді. Сондықтан біз өзімізбен бірге оператор алып бара жатырмыз. Ол концертті толықтай жазып алады. Елге келген соң біз ол концертті Gakku телеарнасы көрермендерінің назарына ұсынатын боламыз» дейді топ мүшелері.

alashainasy.kz