«Алаш айнасының» қызықты статистикасы
«Алаш айнасы» газеті 2009 жылдың 28 қарашасынан бастап шыға бастады. Яғни төрт жыл бес ай уақыт бойы оқырмандарын шұғыл ақпараттармен, салмақты сараптамалармен қамтамасыз етіп келеді.
Аптасына бес рет нөмір дайындайтын газет бүгінде 1000-шы нөмірге де келіп жетті.
Таралымы шамамен 10 мыңды құрайтын газетіміздің жалпы таралымы 10 миллионнан асып кетті.
Кітап өлшемі бойынша есептесек, осы уақытқа дейін жарық көрген 1000 нөмірдегі материалдар 4000 баспа табақты құрайды екен. Яғни әлемдегі ең қалың кітап ретінде Гиннесске тіркелген 5000 беттік Wikipedia кітабынан 16 данасы шығар еді.
«Алаш айнасы» газеті жиналған ақпараттар мен сараптамалық мақалаларды 100 айдар негізінде ұсынып отырады.
«Дат!» айдары ел тізгінін ұстаған шенеуніктер, ат үстінде жүрген депутаттар, зиялы қауым өкілдері, кәсіби маман, білікті басшылар қауымы көкейде жүрген салиқалы да салмақты ой-пікірлерін, тұжырымдарын халыққа жеткізетін мінберге айналды. Бұл айдар арқылы 1000 үлкен сұхбат жарық көрген екен.
«Алашты алаңдатқан сауал» айдары тап бүгінгі күні көпшіліктің көкейінде жүрген сауалға жауап іздейді. Дағдарыстардан шығарға жол іздеп, мәселенің түйінін тарқатады. Бұл айдар бойынша да ортаға 1000 сауал тасталған екен. Оған 3000-ға жуық сарапшы жауап берді.
Газетіміздің беткеұстар айдарына айналған «Ой-көкпар» қоғамдағы туындаған мәселелердің екіжақты қырын көрсетіп, оны шешудің екіжақты жолын көрсетеді. Бұл айдар бойынша да 1000 сауал көтерілді.
Газет ұжымы 63 адамнан тұрады. Бұл – пайғамбар жасына әрі Қазақстандағы зейнет жасына сай. Соның ішінде журналистер саны – 36. Бір қызығы, журналистердің орташа жасы да 36-ны құрайды.
