Академикті еске алуға арналған зияткерлік олимпиада

Қазақ мемлекеттік қыздар педагогикалық университетін­де тіл біліміне  тың зерттеулерімен із қалдырған филолог ғалым, академик Сейілбек Исаевтың  75 жылдығына арналған зияткерлік олимпиада өтті. Лингвистикалық сайыс осымен қатарынан сегізінші жыл ғалым­ның туған күнінде өткізіліп келеді.
«Қыздар университеті» медиаорта­лығының хабарлауынша, «Исаев оқулары­ның» аясында өткен дәстүрлі білім додасына қазақ филологиясы және әлем тілдері факультетінің студенттері қатысты. Сайыстың алғашқы кезеңі қазақ тіл білімінің теориясы, тіл біліміндегі даулы мәселелер, зерттеуші ғалымдар мен олардың еңбектері туралы сұрақтар бойынша өтсе, екінші турда білім­паз жастардың қазақ тіл білімінің ситуация­лық сұрақтарына қатысты пікірі тыңдалды. Олимпиада қорытындысы бойынша бірінші орынды – 3-курс студенті Ә.Тұрдалиева, кейінгі орындарды Р.Әбішева, А.Төлеген, З.Сағын, А.Қалкен сияқты студенттер иемденді. Исаев олимпиадасы соңында студенттер мен қонақтарға академик, профес­сор Сейілбек Мұхамеджарұлы туралы бейнефильм көрсетілді. С.Исаев 1938–1999 жылдар аралығында өмір сүрді. Ол қазақ тілі грамматикасы мен қазақ әдеби тілінің дамуын зерттеп, тіл білімін жылдар бойы қалыптасып келген қасаң түсініктерден арылтуға тырысты. Наурыздың 13-і күні ғалымның туғанына 75 жыл толды.