«Абай жолы» – қытай тілінде

Таяуда Әл-Фараби атындағы Қазақ ұлттық университетінде Әуезов қаламынан туған осы  романның қытай тіліндегі нұсқасының тұсаукесер таныстырылымы болып өтті.
Аталған әдеби-көркем тәржіме қы­тайлық  аудармашылар Ха-Бай мен Гао Сун-Фань тарапынан орындалып, әдемі бе­зендірілген қалың мұқабалы кітап түрінде Бей­жіңде жарық көрген. Осы игі істің басы-қасында жүріп, кітаптың шығуына септігін тигізген елімізге белгілі қайраткер азамат, Парламент Мәжілісі төрағасының орынбасары Жәнібек Кәрібжанов екендігін атап өткен жөн.
Жалпы, ұлттың ұстазы атанған ұлы Абай­дың шығармалары қазақ топырағында ғана емес, алыс-жақын шетелдерге де бұрыннан жақсы таныс. Бізге заманның заңғар жазушысы Мұхтар Әуезов арқылы жеткен Абай әлемі әлі де танып-білуді, зерттеп-зерделеуді қажет етеді. Бүгінде дүниежүзінің бірнеше тіліне аударылған атақты «Абай жолы» роман-эпопеясы әлем­дік деңгейдегі ең озық шығармалар­дың қатарында тұр.
Жаңа кітаптың тұсаукесері барысында тарих ғылымының докторы, профессор, қытайтанушы Нәбижан Мұхаметхан ау­дарманың тарихы, Қытайдағы әдеби ау­дарма  ісінің дамуы жайлы құнды мә­лі­меттерден хабардар етіп, «Абай жолының» қытай тіліндегі осы тәржіме- еңбектің ерекшелігіне тоқталды. Бас­қосуға қатысқан белгілі ғалымдар мен студенттер өзара пікір алмасып, жалпы, көркем әдебиеттің тұлғаны қалыптас­тырудағы маңыздылығы туралы  ойларын ортаға салды.