Мексикалық боксшы Сауль "Канело" Альварес (53-1-2, 36 КО) пен оның ісін жүргізетін Golden Boy промоутерлік компаниясы DAZN стриминг қызметімен келісімге келе алмай отыр, - деп хабарлайды vRINGe.com порталы инсайдер Майк Коппинджерге сілтеме жасап.
Алауыздықтың себебі қаржылық келісім болып отыр - Альвареске уәде етілген соманың жартысы ғана берілетін болыпты.
"Канело" мен DAZN арасындағы келісімшарт бойынша, мексикалық боксшы бір жекпе-жек үшін кемі 35 миллион доллар алу керек екен. Алайда платформа басшылығы бұл уәдесінен тайып отыр. Егер тараптар бір келісімге келмесе, Альварес биыл рингке шықпайтын көрінеді.
DAZN мұндай қадамға барып отырғаны пандемия және қаржылай қиындық есебінен емес. Келісім бойынша Golden Boy жыл сайын "Канелоның" қатысуымен үлкен бокс кешін дүркіретіп өткізуі міндет. Сондықтан DAZN басшылығы промоутерлік компания биылға уәдесін орындаған жоқ деп есептейді.
Мұның алдында DAZN "Канело" мен түркиялық Авни Йылдырым арасындағы жекпе-жекке тыйым салған еді. Стриминг қызметі қазіргі таңда Альвареске қазақстандық Геннадий Головкинмен жекпе-жек үшін ғана 40 миллион беруге дайын.