Тұран университетінде жыл сайын атап өтілетін дәстүрлі төртінші Халықаралық йога күні мерекеленді. «Алматы-Қазақстан, Үнді классикалық би орталығы» мен Тұран университеті бірлесіп ұйымдастырған шараға Қазақстандағы Үндістан елшілігі, Үндістан елшілігінің Үнді Мәдени орталығы да атсалысты. Биыл төртінші жыл қатарынан тойланып отырған Халықаралық йога күні мерекесінің шымылдығын Тұран университетінің ректоры Рахман Алшанов пен Үндістанның Астанадағы елшілігінің кеңесшісі Ганеш Халой құттықтау сөзбен ашты. Олар өз кезегінде халыққа арналған таңғы сауықтыру шарасын бастап берді. Сондай-ақ, таңғы жаттығуға университеттің бірінші проректоры Қуаныш Тазабеков, тәрбие ісі жөніндегі проректор Наталья Герасимова және өзге 85 адам қатысты.
Мерекеге жиналған жұртшылыққа үнді классикалық билерінен концерттік қойылымдар көрсетіліп, йоганың пайдасы жөнінде кеңес берілді және бірлескен таңғы жаттығу жасалды. Көпшілік қауымға «Болливуд» мейрамханасында үнді дастарханы жайылды.
Сонымен қатар, бұл күні Бахаратанатьям, Катхак үнді калассикалық билері, Болливуд биі және үнді әндері орындалған концерттік бағдарлама қойылды.
Жалпы, йога – діни рәсім емес. Бұл адамның өз-өзіне келіп, миын тынықтырып, тыныс алуын реттеп, жалпы рухани ләззат алуына әсер етеді. Күллі әлем және адамзат баласы үшін бұл қажетті құндылық.
Айғаным ШАБАҚОВА.
Алматы ақшамы