Еліміз биыл үшінші жыл қатарынан 1 наурыз – Алғыс айту күнін атап өтуде. 2016 жылғы 14 қаңтарда Қазақстан Республикасының Президенті Н.Назарбаев Қазақстан халқы Ассамблеясының құрылған күні 1 наурызды елімізде «Алғыс айту» күні деп жариялап, №173 Жарлыққа қол қойған болатын.
Алматы да достығы мен ынтымағы жарасқан көп ұлтты қала. Қала бойынша 34 ұлттық мәдени орталықтар жұмыс істейді. Еліміз тәуелсіздік алғаннан бастап, сонау 90-жылдардың басында орыс, украин, беларусь, ауған, осетин, венгер, грузин, дағыстан, молдаван, неміс және т.б. көптеген ұлттық этно-мәдени орталықтары құрылды.
Осы орайда, 2017 жылдан бері Алматы музейінде аталған ұлттық мәдени орталықтармен бірлескен «Ел бірлігі – достықта» атты Алматы қаласында тұратын әр түрлі ұлттар мен этностарға арналған көрмелер тізбегі өтуде. Осыған дейін орыс, бурят, ауған, осетин, шешен-ингуш, беларусь, украин, түркімен, Қырым татарлары мен Жетісу казактарының көрмелері ұйымдастырылды. Көрмелердің мақсаты – қаламыздағы ұлттық мәдени орталықтары арқылы әр түрлі ұлт өкілдерінің ұлттық тұрмыс-тіршілігімен жете таныстыру. Ұлттық бірлік құндылықтарының негіздері, қазақ халқының толеранттылығы, этносаралық қатынастар саласын реттеудің қоғамдық-саяси институты ретіндегі Қазақстан халқы Ассамблеясының қалыптасуы мен дамуындағы халықтар достығына негізделген. Әрі музей қорына әр түрлі ұлт өкілдерінің жәдігерлерін жинақтау. Нәтижесінде музей қоры ауған, бурят, украин, осетин, түркімен халықтарының ұлттық киімдері мен тұрмыстық заттары, тағы басқа жәдігерлермен толықты.
«Біздің Тәуелсіздігіміздің тарихы – бұл барлық этностардың достық жылнамасы. Мен қоғамдағы бейбітшіліктің, келісім мен тұрақтылықтың сақталуын Қазақстанның ең басты жетістіктерінің бірі деп санаймын», – деп Елбасымыз Н.Назарбаев атағанындай, еліміздегі әртүрлі ұлттар мен ұлыстардың өзара достығы мен келісімі тұрақты тәуелсіздігіміздің беріктігін нығайта түскендей.
Алматы музейінде жыл соңына дейін армян, корей, күрт, венгер, грузин, дағыстан, дүнген, еврей, қалмақ мәдени орталықтарының көрмелерін ұйымдастару жоспарланған. Қазақстан халықтары тақырыбына қызығушылық танытқан қала тұрғындары мен қонақтарын көрмені тамашалауға шақырамыз.
Б.Бүркітбаева,
Алматы қаласының музейлер бірлестігі
Алматы музейінің аға ғылыми қызметкері.
Алматы ақшамы газетінен