Елімізде 9 сынып түлектеріне колледждерде тегін білім беру жоспарлануда
Білім және ғылым министрінің орынбасары Бибігүл Асылова жастарды техникалық және кәсіптік біліммен (ТжКБ) қамтуды кеңейтуге бағытталған жұмыстар туралы айтты, деп хабарлайды Stan.kz ақпарат агенттігі.
Оның айтуынша, жыл сайын 9-сынып түлектерінің 30%-ы және 11-сынып түлектерінің 50%-дан астамы ақылы оқуға түседі.
"Біз ТжКБ жастарын қамтуды кеңейтуге тиіспіз. Бұл бағыттағы жұмыс 2017 жылдан бері жүргізіліп келеді. 300 мыңға жуық адам бірінші жұмысшы мамандығын тегін алды. Аудандық және қалалық әкімдіктермен бірлесіп, жастарды сұранысқа ие мамандықтар бойынша тегін техникалық және кәсіптік біліммен жастарды 100 пайыз қамтуға кезең-кезеңмен өтуді жоспарлап отырмыз. Ол үшін 2025 жылға дейін мемлекеттік тапсырыс көлемін 20 мыңнан 50 мың орынға дейін арттыру ескерілген",- деді вице-министр.
Бибігүл Асылованың сөзінше, бірінші кезекте 9-сынып түлектерін колледждерде тегін оқытумен қамтамасыз ету жоспарланған.
Бұған дейін вице-министр Қазақстанда колледждерге түсу емтихандары болмайтынын хабарлады.
